एकीकडे राज्यातील तापमानात घसरण झाल्याने थंडीचा जोर वाढला असून याच दरम्यान राज्याच्या वातावरणात येत्या काही दिवसांत बदल होण्याचा अंदाज हवामान खात्याने वर्तवला आहे. दरम्यान जळगावात आज तुरळक पावसाचा अंदाज वर्तविण्यात आला आहे. यामुळे शेतकरी वर्गाची चिंता वाढणार आहे.
महाराष्ट्राच्या विविध भागात, विशेषत: धुळे, नाशिक, निफाड, पुणे, छत्रपती संभाजीनगर, जळगाव, परभणी येथे तापमान १० अंश सेल्सिअसच्या खाली नोंदवले गेले आहे. पहाटेच्या वेळी अनेक भागांत धुक्याची चादर आणि प्रचंड गारवा जाणवत आहे. हवामान विभागानुसार, उत्तर कोकण, मराठवाडा आणि उत्तर महाराष्ट्रामध्ये अवकाळी पावसाचा अंदाज वर्तवण्यात आला आहे.
आगामी काही दिवसांत किमान तापमानात थोडी वाढ होण्याची शक्यता आहे, असा हवामान विभागाचा अंदाज आहे. कोकण, मध्य महाराष्ट्र आणि मराठवाडा या भागांमध्ये हलक्या ते मध्यम पावसाची शक्यता वर्तवण्यात आली आहे. विदर्भातील हवामान पुढील पाच दिवस कोरडेच राहील, आणि थंडीचा जोर कायम राहणार आहे. इतर भागांमध्ये तापमानात वाढ होण्याबरोबरच हलक्या ते मध्यम पावसाच्या सरी पडण्याची शक्यता आहे.
Discussion about this post