जळगाव । सोशल मीडियावर झटपट प्रसिद्धी मिळवण्याच्या हव्यासापोटी गुन्हेगारीचे उदात्तीकरण करणारे, शस्त्रांचे प्रदर्शन करून ‘भाईगिरी’ मिरवणारे आणि वाहतूक नियमांची ऐशीतैशी करून जीवघेणी स्टंटबाजी करणाऱ्या ‘रील्स बहाद्दरांना’ जळगाव पोलिसांनी चांगलाच इंगा दाखवला आहे. महिलांचा अवमान करणाऱ्या आणि समाजात दहशत निर्माण करणाऱ्या अशा आक्षेपार्ह रील्सची गंभीर दखल घेत जळगाव जिल्हा पोलीस अधीक्षक श्रीकांत धिवरे यांच्या मार्गदर्शनाखाली मंगळवारी (७ जुलै) जिल्ह्यात ‘सायबर पॅट्रोलिंग’ची मोठी मोहीम राबवण्यात आली. या मोहिमेत हुल्लडबाजांची धरपकड करून त्यांना थेट पोलीस मुख्यालयात आणत कायद्याचा कडक डोस देण्यात आला.
पोलिसांच्या म्हणण्यानुसार, अशा प्रकारचे व्हिडिओ युवकांवर विपरीत परिणाम करत असून गुन्हेगारी आणि नियमभंगाला प्रोत्साहन देतात. स्टंटबाजीमुळे अपघाताचा धोका वाढतो, तर महिलांचा अवमान करणारी सामग्री समाजात चुकीचा संदेश पोहोचवते. त्यामुळे अशा आशयाच्या रील्सवर लक्ष ठेवून संबंधितांविरुद्ध कारवाई करण्यात येत आहे.पोलिसांच्या या धडक कारवाईचा उद्देश केवळ दंडात्मक कारवाई करणे एवढाच नव्हता, तर तरुणांमध्ये कायद्याबद्दल आदर निर्माण करणे आणि त्यांना गुन्हेगारीच्या दलदलीत जाण्यापासून परावृत्त करणे हा होता.
ही मोहीम जिल्हा पोलीस अधीक्षक श्रीकांत धिवरे यांच्या मार्गदर्शनाखाली राबविण्यात आली. उपविभागीय पोलीस अधिकारी नितीन गणापुरे, स्थानिक गुन्हे शाखेचे पोलीस निरीक्षक राहुल गायकवाड आणि त्यांच्या पथकाने सायबर पॅट्रोलिंगद्वारे संबंधितांची ओळख पटवून त्यांना कायद्याची जाणीव करून दिली.
सोशल मीडियाचा जबाबदारीने वापर करावा, समाजविघातक किंवा कायद्याचे उल्लंघन करणारा मजकूर व व्हिडिओ प्रसारित करू नयेत, अन्यथा कठोर कायदेशीर कारवाई करण्यात येईल, असा इशाराही जळगाव पोलिसांनी दिला आहे.
Discussion about this post