जळगाव : गेल्या अनेक दिवसांपासून चर्चेत असलेल्या जळगाव जिल्हा काँग्रेसच्या संघटनात्मक बदलांना अखेर मूर्त स्वरूप मिळाले आहे. अखिल भारतीय काँग्रेस कमिटीने रात्री उशिरा जिल्ह्यातील तीन नवीन जिल्हाध्यक्षांच्या नियुक्तीची अधिकृत घोषणा केली. या निवडीमुळे जिल्ह्यातील काँग्रेसच्या राजकारणाला नवसंजीवनी मिळणार असल्याची चर्चा सुरू झाली आहे.
पक्षाने यावेळी संघटनेत मोठा बदल करत नव्या आणि सक्रिय चेहऱ्यांवर विश्वास दाखवला आहे. रावेर लोकसभा क्षेत्रासाठी जळगाव पूर्व जिल्हाध्यक्षपदी युवा नेते धनंजय शिरीष चौधरी यांची नियुक्ती करण्यात आली आहे. काँग्रेसच्या जळगाव जिल्ह्यातील इतिहासात ते पक्षाचे सर्वात तरूण जिल्हाध्यक्ष ठरणार आहेत. धनंजय चौधरी यांना उज्वल राजकीय वारसा असून धनाजी नाना चौधरी, मधुकरराव चौधरी आणि त्यांचे पिताजी शिरीषदादा चौधरी यानंतर त्यांना आता मोठ्या पदावर काम करण्याची संधी लाभली आहे.त्यांच्या नियुक्तीमुळे युवकांमध्ये उत्साहाचे वातावरण निर्माण झाले आहे.
तसेच काँग्रेस पक्षाने यासोबत, जळगाव पश्चीम म्हणजेच जळगाव लोकसभा क्षेत्राच्या जिल्हाध्यक्षपदाची जबाबदारी ॲड. अविनाश भालेराव यांच्याकडे सोपविली आहे. ते पक्षाचे निष्ठावंत पदाधिकारी असल्याने त्यांची जिल्हाध्यक्षपदावर निवड करण्यात आली. तर जळगाव महानगर जिल्हाध्यक्षपद हे जमील शेख यांना जाहीर करण्यात आले आहे. या माध्यमातून काँग्रेस पक्षश्रेष्ठींनी भाकरी फिरवत नवीन चेहऱ्यांना संधी दिल्याचे दिसून येत आहे.
या तिन्ही नियुक्त्यांमुळे काँग्रेसने आगामी स्थानिक स्वराज्य संस्था निवडणुका आणि संघटन विस्ताराच्या दृष्टीने तयारी सुरू केल्याचे मानले जात आहे. जिल्ह्यातील काँग्रेस कार्यकर्त्यांमध्ये नव्या नियुक्त्यांनंतर उत्साहाचे वातावरण असून अनेकांनी नव्या पदाधिकाऱ्यांचे स्वागत केले आहे.
Discussion about this post