मुंबई/जळगाव| महाराष्ट्रात सलग पाचव्या दिवशीही पावसाचा जोर कायम असून मुंबई, पुण्यासह राज्यातील अनेक जिल्ह्यांना मुसळधार पावसाने झोडपून काढले आहे. अनेक ठिकाणी पूरसदृश परिस्थिती निर्माण झाली असून जनजीवन विस्कळीत झाले आहे. दरम्यान, पुढील २४ तास राज्यासाठी अत्यंत महत्त्वाचे असल्याचा इशारा भारतीय हवामान विभागाने दिला असून नागरिकांनी सतर्क राहण्याचे आवाहन करण्यात आले आहे.
हवामान विभागाच्या अंदाजानुसार, आज पुणे आणि सातारा जिल्ह्यातील घाटमाथ्यावर अतिवृष्टीची शक्यता असून या भागांसाठी ऑरेंज अलर्ट जारी करण्यात आला आहे. तसेच कोकणातील पालघर, रायगड, रत्नागिरी तसेच कोल्हापूरच्या घाटमाथ्यावर काही ठिकाणी जोरदार पावसाचा अंदाज व्यक्त करण्यात आला असून या भागांना येलो अलर्ट देण्यात आला आहे. विदर्भातील काही जिल्ह्यांमध्येही विजांच्या कडकडाटासह पावसाची शक्यता असल्याने नागरिकांना आवश्यक ती खबरदारी घेण्याचे आवाहन करण्यात आले आहे.
दरम्यान, नाशिक जिल्ह्यासाठीही ऑरेंज अलर्ट जारी करण्यात आला आहे. सकाळी ७ वाजल्यापासून पुढील तीन तास वादळी वाऱ्यासह मुसळधार पावसाचा अंदाज व्यक्त करण्यात आला आहे. रात्रीपासून सुरू असलेल्या संततधार पावसामुळे गोदावरी नदीच्या पाणीपातळीत मोठी वाढ झाली असून दुतोंड्या मारुती मंदिराजवळ गुडघ्यापेक्षा वरपर्यंत पुराचे पाणी पोहोचले आहे. प्रशासनाने नदीकाठच्या नागरिकांना सतर्कतेचा इशारा दिला आहे. त्र्यंबकेश्वर शहरातही मुसळधार पावसामुळे अनेक रस्ते जलमय झाले असून ठिकठिकाणी पूरसदृश परिस्थिती निर्माण झाली आहे.
दरम्यान, जळगाव जिल्ह्यासाठीही हवामान विभागाने महत्त्वाचा अंदाज व्यक्त केला आहे. आज (८ जुलै) चोपडा, धरणगाव, एरंडोल, पाचोरा आणि जळगाव तालुक्यातील काही भागांत मुसळधार पावसाची शक्यता वर्तविण्यात आली आहे. या पावसासाठी हवेची दिशा महत्त्वाची ठरणार असून, वाऱ्यांची दिशा बदलल्यास पावसाचा पट्टा छत्रपती संभाजीनगरच्या दिशेने सरकण्याची शक्यता हवामान तज्ज्ञांनी व्यक्त केली आहे.
हवामान विभागाने यापूर्वीही जळगाव जिल्ह्यासाठी अनेक वेळा मुसळधार पावसाचा अंदाज व्यक्त केला होता. मात्र, काही अंदाजच प्रत्यक्षात खरे ठरले. त्यामुळे यावेळच्या अंदाजाकडे शेतकऱ्यांसह सर्व नागरिकांचे लक्ष लागले आहे. खरीप हंगामाच्या पार्श्वभूमीवर दमदार आणि सातत्यपूर्ण पावसाची आवश्यकता असल्याने येत्या २४ तासांतील परिस्थिती महत्त्वाची ठरणार आहे.
Discussion about this post