सातारा | सातारा जिल्ह्यातील फलटण तालुक्यात बुधवारी पहाटे अत्यंत दुर्दैवी घटना घडली. घरासमोरील विद्युत केबलमध्ये उतरलेल्या विजेच्या प्रवाहाचा धक्का लागून एकाच कुटुंबातील चार जणांचा जागीच मृत्यू झाला. एकमेकांना वाचविण्याच्या प्रयत्नात ही दुर्घटना घडल्याने संपूर्ण परिसरात हळहळ व्यक्त होत आहे.
ही घटना फलटण तालुक्यातील खामगाव येथे खासगी इंग्रजी माध्यमाच्या शाळेजवळ घडली. मृतांमध्ये पिसुरड्या किसन शिंदे (वय ४८), गंगुबाई पिसुरड्या शिंदे (वय ४६), सचिन पिसुरड्या शिंदे (वय २६) आणि आरती पिसुरड्या शिंदे (वय २२) यांचा समावेश आहे.
मिळालेल्या माहितीनुसार, बुधवारी पहाटे साडेपाच ते सहा वाजण्याच्या सुमारास शिंदे कुटुंबातील सदस्य घराबाहेर आले होते. त्याचवेळी घरासमोरील विद्युत केबलमध्ये अचानक विद्युत प्रवाह उतरल्याने पिसुरड्या किसन शिंदे यांना जोरदार विजेचा धक्का बसला. त्यांना वाचविण्यासाठी कुटुंबातील गंगुबाई, सचिन आणि आरती हे तातडीने धावले.
मात्र, विद्युत प्रवाहाची तीव्रता इतकी जास्त होती की, एकामागून एक तिघेही त्या प्रवाहाच्या संपर्कात आले. काही क्षणांतच चौघांचाही जागीच मृत्यू झाला. या हृदयद्रावक घटनेमुळे गावात शोककळा पसरली असून शिंदे कुटुंबावर दुःखाचा डोंगर कोसळला आहे. घटनेची माहिती मिळताच ग्रामस्थांनी घटनास्थळी मोठी गर्दी केली. फलटण ग्रामीण पोलीस ठाण्याचे पोलीस निरीक्षक राजकुमार भुजबळ यांच्या मार्गदर्शनाखाली पोलीस पथक तातडीने घटनास्थळी दाखल झाले. पोलिसांनी पंचनामा करून चारही मृतदेह शवविच्छेदनासाठी फलटण उपजिल्हा रुग्णालयात पाठवले आहेत.
दरम्यान, विद्युत केबलमध्ये अचानक प्रवाह कसा उतरला, या दुर्घटनेमागील नेमके कारण काय, याचा सखोल तपास पोलीस आणि संबंधित यंत्रणांकडून सुरू आहे. या दुर्दैवी घटनेने संपूर्ण सातारा जिल्हा हादरला असून नागरिकांकडून शिंदे कुटुंबीयांप्रती हळहळ व्यक्त केली जात आहे.
Discussion about this post