दुष्काळ उपाययोजना उपसमितीत गिरीश महाजन-गुलाबराव पाटलांचा समावेश; जळगावच्या शेतकऱ्यांना मदतीची आशा

जळगाव । पावसाच्या लहरीपणामुळे जळगाव जिल्ह्यातसह राज्यातील बळीराजा संकटात सापडला आहे. राज्यात सरासरीपेक्षा अत्यंत कमी पाऊस झाल्याने दुष्काळसदृश परिस्थिती निर्माण झाली आहे. या गंभीर परिस्थितीवर तातडीने मात करण्यासाठी आणि उपाययोजना राबवण्यासाठी महसूलमंत्री चंद्रशेखर बावनकुळे यांच्या अध्यक्षतेखाली विशेष मंत्रिमंडळ उपसमिती स्थापन करण्यात आली असल्याची घोषणा मुख्यमंत्री देवेंद्र फडणवीस यांनी केली आहे.

विशेष या समितीत जळगावचे प्रतिनिधीत्व करणारे जलसंपदा व आपत्ती व्यवस्थापन मंत्री गिरीष महाजन आणि पाणीपुरवठा व स्वच्छता मंत्री गुलाबराव पाटील यांचाही समावेश करण्यात आला आहे. या निर्णयामुळे जळगाव जिल्ह्यातील बाधित शेतकऱ्यांसाठी शासनाकडून ठोस मदतीची उपाययोजना राबविल्या जाण्याची मोठी आशा निर्माण झाली आहे.

जळगाव जिल्ह्यातील जळगाव, भुसावळ, यावल, चाळीसगाव, जामनेर आणि बोदवड या तालुक्यांमध्ये सरासरीच्या तुलनेत ७० टक्क्यांपेक्षाही कमी पाऊस झाल्याचे सांगण्यात आले आहे. पावसाचे कमी आणि अनियमित वितरण झाल्याचा फटका खरीप पिकांना बसला आहे. उडीद, मूग, सोयाबीन, तीळ, मका आणि ज्वारी या पिकांच्या उत्पादनावर परिणाम होण्याची शक्यता आहे. अनेक भागांत कोरडवाहू कपाशीची वाढही खुंटली असून त्याचाही उत्पादनावर परिणाम होऊ शकतो.

रब्बी हंगामासमोरही आव्हान

खरीप हंगामावर पावसाच्या अनियमिततेचा परिणाम झाल्यानंतर आता शेतकऱ्यांचे लक्ष रब्बी हंगामाकडे लागले आहे. उपलब्ध जलसाठ्याचा काटकसरीने वापर, कालव्यांच्या आवर्तनांचे नियोजन तसेच पिण्याचे पाणी आणि पशुधनासाठी चारा उपलब्ध करून देणे या बाबींवर आगामी काळात भर द्यावा लागणार आहे. राज्य सरकारकडून पुढील सात ते आठ महिन्यांसाठी पाणी आणि चारा नियोजन करण्याची माहिती देण्यात आली आहे.

मंत्रिमंडळ उपसमितीत जळगावच्या दोन मंत्र्यांचा समावेश

दुष्काळसदृश्य परिस्थितीतील उपाययोजनांसाठी स्थापन करण्यात आलेल्या मंत्रिमंडळ उपसमितीचे अध्यक्ष महसूलमंत्री चंद्रशेखर बावनकुळे असतील. समितीत जलसंपदा व आपत्ती व्यवस्थापन मंत्री गिरीष महाजन, पाणीपुरवठा व स्वच्छता मंत्री गुलाबराव पाटील, मृद व जलसंधारण मंत्री संजय राठोड, पशुसंवर्धन मंत्री पंकजा मुंडे आणि कृषिमंत्री दत्तात्रय भरणे यांच्यासह अन्य मंत्र्यांचा समावेश आहे.

समितीसमोर दुष्काळसदृश्य भागातील परिस्थितीचा आढावा घेऊन पाणी, चारा आणि शेतीशी संबंधित उपाययोजनांबाबत निर्णय घेण्याचे आव्हान असणार आहे. त्यामुळे जळगाव जिल्ह्यातील कमी पावसामुळे बाधित झालेल्या शेतकऱ्यांसाठी शासनाकडून मदत आणि उपाययोजना जाहीर होण्याची अपेक्षा निर्माण झाली आहे.

राज्याच्या पाणीपुरवठा व स्वच्छता विभागाच्या अधिकृत माहितीनुसार गुलाबराव पाटील हे सध्या या विभागाचे मंत्री आहेत.