मुंबई । जागतिक तणाव आणि देशांतर्गत राजकारणातील निवडणुकांचा टप्पा ओलांडताच महागाईने पुन्हा एकदा डोके वर काढले आहे. इराण आणि अमेरिका यांच्यातील वाढत्या युद्धजन्य परिस्थितीचा थेट परिणाम भारतीय स्वयंपाकघरापर्यंत पोहोचला आहे. आज म्हणजेच १ मे २०२६ सरकारी तेल कंपन्यांनी कमर्शियल एलपीजी सिलिंडरच्या किमतीत तब्बल ९९३ रुपयांची विक्रमी वाढ केली आहे.
यामुळे हॉटेल, रेस्टॉरंट आणि खानावळींमधील जेवण महागण्याची शक्यता निर्माण झाली आहे. मुंबई, पुणे, नाशिकसह दिल्ली, चेन्नई आणि कोलकात्यात ही दरवाढ लागू झाली आहे. व्यावसायिक गॅस सिलिंडरचा आधीच तुटवडा असताना, आता किमतीत प्रचंड वाढ झाल्याने छोट्या व्यावसायिकांना मोठा आर्थिक फटका बसणार आहे. “आम्ही व्यवसाय करायचा कसा?” असा संतप्त सवाल आता हॉटेल व्यावसायिकांकडून विचारला जात आहे.
मे महिना सुरू होताच व्यावसायिक एलपीजी ग्राहकांना हा मोठा धक्का बसला आहे. इंडियन ऑईल कॉर्पोरेशनने (IOC) जाहीर केलेल्या नवीन दरानुसार, व्यावसायिक सिलिंडरच्या दरात ९९३ रुपयांची वाढ झाली आहे. या नव्या दरामुळे आता एका सिलिंडरची किंमत २,०७८.५० रुपयांवरून थेट ३,०७१.५० रुपये इतकी झाली आहे.
होर्मुज खाडी बंद असल्याने जग वेगळ्या संकटात आहे. एलपीजी गॅसची आयात आणि निर्यात ठप्प आहे. भारताच्या शेजारील देशात तीनतेरा वाजले आहेत. त्या तुलनेत भारतातील स्थिती स्थिर आहे. जोपर्यंत होर्मुज खाडी पूर्णपणे खुली होणार नाही, तोवर एलपीजीचे संकट कायम राहणार आहे. घरगुती गॅसच्या किमतीमध्येही सरकारकडून मोठी वाढ केली जाऊ शकते, अशी चर्चा आहे. पण सध्या कमर्शियल एलपीजी गॅसच्याच किमतीत वाढ करण्यात आली.
Discussion about this post