जळगाव । जळगावच्या पाळधी येथे शाळा सुटल्यानंतर बस पकडताना एका विद्यार्थिनीचा पाय घसरून ती बसखाली आल्याची हृदयद्रावक घटना घडली. या अपघातात राजनंदिनी शिंदे या विद्यार्थिनीचा दुर्दैवी मृत्यू झाला. ती पाळधी येथील झंवर विद्यालयात शिक्षण घेत होती.
मिळालेल्या माहितीनुसार, शाळा सुटल्यानंतर गावाकडे जाणाऱ्या बसमध्ये चढण्यासाठी विद्यार्थ्यांची मोठी गर्दी झाली होती. याच गर्दीत बसमध्ये चढत असताना राजनंदिनीचा अचानक पाय घसरला. ती खाली पडून बसखाली आल्याने गंभीर दुखापत झाली. या दुर्घटनेत तिचा मृत्यू झाला.
या घटनेनंतर परिसरात हळहळ व्यक्त होत असून ग्रामस्थांमध्ये संतापाचे वातावरण आहे. शाळा सुटल्यानंतर विद्यार्थ्यांची मोठी गर्दी होत असल्याने विद्यार्थ्यांच्या सुरक्षिततेचा प्रश्न ऐरणीवर आला आहे. विद्यार्थ्यांसाठी स्वतंत्र बसफेऱ्या सुरू करण्यात याव्यात, अशी मागणी ग्रामस्थांनी केली आहे.
Discussion about this post