नंदुरबार | भाजपचे आमदार तथा माजी आदिवासी विकास मंत्री डॉ. विजयकुमार गावित यांच्या नावाचे कथित बनावट लेटरहेड आणि बनावट स्वाक्षरी वापरून शासन निर्णयात बदल घडवून आणल्याचा गंभीर प्रकार नंदुरबारमध्ये उघडकीस आला आहे. या प्रकरणी शिवसेनेचे (शिंदे गट) माजी आमदार शिरीष चौधरी, नगरसेवक गौरव चौधरी यांच्यासह चौघांविरुद्ध नंदुरबार शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, आमदार डॉ. विजयकुमार गावित यांनी २०२४ मध्ये नंदुरबार नगरपरिषद हद्दीतील विविध समाजमंदिरे, सभागृहे आणि विकासकामांसाठी शासनाकडून कोट्यवधी रुपयांचा निधी मंजूर करून घेतला होता. या मंजूर कामांमध्ये बदल करण्यासाठी त्यांच्या नावाचे बनावट लेटरहेड तयार करण्यात आल्याचा आरोप आहे.
तक्रारीनुसार, आरोपींनी डॉ. गावित यांच्या बनावट स्वाक्षऱ्या करून मंत्रालयात पत्रे सादर केली. त्यानंतर मूळ शासन निर्णयामध्ये शुद्धीपत्रकाद्वारे बदल करण्यात आला आणि सुमारे ९ कोटी रुपयांचा निधी इतर कामांकडे वळविण्यात आल्याचा आरोप करण्यात आला आहे.
या प्रकरणी डॉ. विजयकुमार गावित यांचे स्वीय सहाय्यक अशोक शिवाजी बेहेरे यांनी नंदुरबार शहर पोलीस ठाण्यात तक्रार दाखल केली. प्राथमिक चौकशीनंतर पोलिसांनी माजी आमदार शिरीष चौधरी, नगरसेवक गौरव चौधरी, नयन चौधरी, अकाउंटंट किशोर तुळशिराम पाटील तसेच अन्य अज्ञात व्यक्तींविरुद्ध गुन्हा नोंदविला आहे.
तक्रारीनुसार, ऑगस्ट २०२५ ते जानेवारी २०२६ या कालावधीत आरोपींनी कथितरीत्या चार बनावट लेटरहेड तयार करून त्यावर डॉ. गावित यांच्या बनावट स्वाक्षऱ्या केल्या आणि ती पत्रे मंत्रालयात सादर केली. त्याआधारे १९ जानेवारी, २१ जून आणि २३ ऑगस्ट २०२४ रोजी मंजूर झालेल्या शासन निर्णयांमध्ये बदल करण्यात आल्याचा आरोप आहे.
या प्रकरणामुळे नंदुरबारच्या राजकीय वर्तुळात मोठी खळबळ उडाली असून, पोलिसांकडून पुढील तपास सुरू आहे. तपासानंतरच या प्रकरणातील सर्व तथ्य स्पष्ट होणार आहेत.
Discussion about this post