बोदवड । बोदवड पोलीस ठाण्याच्या हद्दीत गुन्हेगारी प्रवृत्तीवर प्रतिबंधात्मक नियंत्रण ठेवून कायदा व सुव्यवस्था अबाधित राखण्यासाठी पोलिसांनी शुक्रवारी रात्रभर व्यापक ‘कॉम्बिंग ऑपरेशन’ राबवले. या धडक कारवाईत पोलीस रडारवर असलेल्या तब्बल ६० रेकॉर्डवरील आरोपींची तपासणी करण्यात आली. त्यापैकी आढळून आलेल्या तीन संशयितांवर तात्काळ प्रतिबंधात्मक कारवाई करण्यात आली आहे.
अवैध दारू जप्त; ४२ वाहनांची झाडाझडती
या ऑपरेशनदरम्यान पोलिसांनी अवैध दारू धंद्यांवर छापे टाकून ५५ लिटर गावठी दारू आणि ६६ नग देशी दारूच्या बाटल्या असा एकूण १० हजार ७८० रुपयांचा मुद्देमाल जप्त केला. याप्रकरणी महाराष्ट्र दारूबंदी अधिनियमांतर्गत कायदेशीर कारवाई सुरू आहे. याशिवाय, पोलिसांनी संशयास्पद वाटणाऱ्या ४२ मोटारसायकलींची कसून तपासणी केली असून, त्यांच्या कागदपत्रांची पडताळणी RTO मार्फत केली जात आहे. अनियमितता आढळल्यास संबंधित वाहनधारकांवर कडक कारवाईचा इशारा पोलिसांनी दिला आहे.
मोठा पोलीस ताफा मैदानात
ही कारवाई पोलीस अधीक्षक श्रीकांत धिवरे आणि अपर पोलीस अधीक्षक संदीप गावित यांच्या मार्गदर्शनाखाली पार पडली. यामध्ये मुक्ताईनगर विभागाचे उपविभागीय पोलीस अधिकारी नंदराज पाटील, परि. उप अधीक्षक सह्याद्री बिर्ले, स्थानिक गुन्हे शाखेचे (LCB) पोलीस निरीक्षक राहुल गायकवाड यांच्यासह २ उपविभागीय पोलीस अधिकारी, ८ पोलीस अधिकारी, १३० पोलीस अंमलदार आणि आर.सी.पी. (RCP) पथकाचा ताफा सहभागी झाला होता.
नागरिकांना सहकार्याचे आवाहन
बोदवड परिसरात गुन्हेगारी, अवैध दारूविक्री, अमली पदार्थ व जुगारासारख्या बेकायदेशीर कृत्यांना आळा घालण्यासाठी अशा कारवाया यापुढेही सतत सुरू राहतील, असा इशारा पोलिसांनी दिला आहे. तसेच, अवैध धंद्यांची माहिती नागरिकांनी निर्भयपणे पोलिसांना द्यावी, माहिती देणाऱ्याचे नाव पूर्णपणे गोपनीय ठेवले जाईल, असे आवाहन पोलीस अधीक्षक श्रीकांत धिवरे यांनी केले आहे.
Discussion about this post