विमुक्त जाती, भटक्या जमाती व विशेष मागास प्रवर्गासाठी विविध योजनांच्या लाभासाठी ऑनलाईन अर्ज करण्याचे आवाहन

जळगाव | विमुक्त जाती व भटक्या जमाती तसेच विशेष मागास प्रवर्ग समाजाच्या आर्थिक उन्नतीसाठी कार्यरत असलेल्या वसंतराव नाईक विमुक्त जाती व भटक्या जमाती विकास महामंडळ (मर्या.) तसेच त्याअंतर्गत कार्यरत सहा उपकंपन्यांच्या विविध योजनांचा लाभ घेण्यासाठी पात्र अर्जदारांनी ऑनलाईन अर्ज करावेत, असे आवाहन जिल्हा व्यवस्थापक, जळगाव यांनी केले आहे.

महामंडळाअंतर्गत कार्यरत उपकंपन्यांमध्ये पैलवान कै. मारुती चव्हाण-वडार आर्थिक विकास महामंडळ, राजे उमाजी नाईक आर्थिक विकास महामंडळ, श्रीकृष्ण आर्थिक विकास महामंडळ, ब्रम्हलीन आचार्य दिव्यानंद पुरीजी महाराज आर्थिक विकास महामंडळ, विणकर समाज आर्थिक विकास महामंडळ तसेच श्री. शिव गोरक्षनाथ नाथपंथी समाज आर्थिक विकास महामंडळ यांचा समावेश आहे.

महामंडळामार्फत विविध आर्थिक सहाय्य योजना राबविण्यात येत आहेत. यामध्ये २५ टक्के बीज भांडवल कर्ज योजना, वैयक्तिक कर्ज व्याज परतावा योजना, गट कर्ज व्याज परतावा योजना तसेच रुपये १.०० लाख थेट कर्ज योजनेअंतर्गत संपूर्ण कर्ज महामंडळाकडून उपलब्ध करून दिले जाणार आहे. लाभार्थ्यांनी दरमहा २,०५८ रुपयांचे ४८ समान हप्ते नियमित भरल्यास कोणतेही व्याज आकारले जाणार नाही. मात्र, थकित हप्त्यांवर वार्षिक ४ टक्के व्याजदर लागू होणार आहे.

तसेच व्याज परतावा योजनेत कर्ज बँकेमार्फत दिले जाणार असून, लाभार्थ्यांनी कर्जाची नियमित परतफेड केल्यास कमाल १२ टक्क्यांपर्यंतचे व्याज महामंडळाकडून लाभार्थ्यांच्या बँक खात्यात जमा केले जाणार आहे.

योजनांचा लाभ घेण्यासाठी इच्छुकांनी vnvjntdc.org या संकेतस्थळावर ऑनलाईन अर्ज करावेत. अधिक माहितीसाठी जळगाव जिल्हा कार्यालयास संपर्क साधावा, असे आवाहन जिल्हा व्यवस्थापक राहुल नरवडे यांनी केले आहे.