जळगाव : बँकेत पैसे भरण्यासाठी आलेल्या ग्राहकावर पाळत ठेवत त्याचा पाठलाग करून संधी साधत ७७ हजार ५०० रुपयांची रोकड लंपास करणाऱ्या आंतरराज्यीय टोळीचा पाचोरा पोलिसांनी पर्दाफाश केला आहे. सीसीटीव्ही फुटेज, तांत्रिक तपास आणि गोपनीय माहितीच्या आधारे पोलिसांनी मध्यप्रदेशातील राजगड जिल्ह्यातील सांसी कडिया परिसरात धडक देत रितीक राजाराम सिसोदिया या संशयिताला अटक केली. त्याच्याकडून चोरीची संपूर्ण ७७ हजार ५०० रुपयांची रोकड हस्तगत करण्यात आली आहे.
ही घटना १९ ऑगस्ट रोजी घडली. बनोटी (ता. सोयगाव, जि. छत्रपती संभाजीनगर) येथील दिनेश निलेश सोनवणे हे पाचोरा शहरातील स्टेट बँक ऑफ इंडियाच्या शाखेत पैसे भरण्यासाठी आले होते. मात्र, बँकेत मोठी गर्दी असल्याने ते कृषी उत्पन्न बाजार समितीजवळील एका ऑटो गॅरेजमध्ये दुचाकी दुरुस्तीसाठी गेले.
याचदरम्यान आरोपीने सोनवणे यांच्यावर बँकेपासूनच पाळत ठेवली होती. गॅरेजमध्ये ते कामात व्यस्त असल्याची संधी साधत आरोपीने ७७ हजार ५०० रुपयांची रोकड असलेली बॅग लंपास केली आणि पसार झाला. या प्रकरणी पाचोरा पोलीस ठाण्यात BNS कलम ३०३ (२) अन्वये गुन्हा दाखल करण्यात आला होता.
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि डीवायएसपी बापू रोहोम यांच्या मार्गदर्शनाखाली पोलीस निरीक्षक राहुलकुमार पवार यांनी तपासाला गती दिली.गुन्हे शोध पथकातील पोलीस कॉन्स्टेबल हरीश परदेशी आणि त्यांच्या सहकाऱ्यांनी बँक तसेच परिसरातील अनेक सीसीटीव्ही फुटेज तपासले. फुटेजमध्ये संशयित आरोपी बँकेपासून गॅरेजपर्यंत फिर्यादीचा पाठलाग करत असल्याचे पोलिसांच्या निदर्शनास आले.
यानंतर तांत्रिक तपास आणि गोपनीय माहितीच्या आधारे या गुन्ह्यामागे मध्यप्रदेशातील राजगड जिल्ह्यातील गुन्हेगारी पार्श्वभूमी असलेल्या टोळीचा सहभाग असल्याची माहिती पोलिसांना मिळाली.
मध्यप्रदेशात पाचोरा पोलिसांची धडक
मिळालेल्या माहितीच्या आधारे पाचोरा पोलिसांचे विशेष पथक १ ऑक्टोबर रोजी मध्यप्रदेशात रवाना झाले. बोड़ा पोलीस ठाण्याच्या हद्दीतील सांसी कडिया परिसरात स्थानिक पोलिसांच्या मदतीने ३ ऑक्टोबर रोजी कारवाई करण्यात आली.या कारवाईत रितीक राजाराम सिसोदिया याला ताब्यात घेण्यात आले. पोलिसांच्या चौकशीत त्याचा या चोरीच्या गुन्ह्यात सहभाग समोर आला. त्याच्याकडून चोरीला गेलेली ७७ हजार ५०० रुपयांची संपूर्ण रोकड हस्तगत करण्यात आली.
या कारवाईमुळे बँक परिसरात ग्राहकांवर पाळत ठेवून संधी साधत चोरी करणाऱ्या आंतरराज्यीय टोळीविरोधात पाचोरा पोलिसांनी महत्त्वाची कामगिरी बजावली आहे.
Discussion about this post