राजकीय वर्तुळातून एक मोठी बातमी समोर आली आहे. शिवसेना शिंदे गटाचे नेते आणि आमदार बच्चू कडू यांच्यासह सहा जणांविरोधात चंद्रपूर जिल्ह्यातील घुग्घूस पोलिस ठाण्यात गुन्हा दाखल करण्यात आला आहे. विनापरवानगी पायी मोर्चा काढणे, बेकायदेशीर जमाव जमविणे तसेच भाषणातून प्रक्षोभक वक्तव्ये केल्याचा आरोप त्यांच्यावर ठेवण्यात आला आहे. तहसीलदारांना पुलाखाली फेकण्याची धमकी दिल्याचा आरोपही या प्रकरणात करण्यात आला आहे. या घटनेमुळे राजकीय वर्तुळात चर्चा सुरू झाली आहे.
स्थानिक भूमिपुत्रांच्या मागण्यांसाठी काढला मोर्चा
मिळालेल्या माहितीनुसार, चंद्रपूर जिल्ह्यातील वेकोलिच्या कोळसा खाणींमध्ये स्थानिक भूमिपुत्रांना ८० टक्के नोकऱ्यांमध्ये प्राधान्य द्यावे, यासह विविध मागण्यांसाठी आमदार बच्चू कडू यांच्या अध्यक्षतेखाली पायी मोर्चा काढण्यात आला होता. यवतमाळ जिल्ह्यातील पैनगंगा पुलापासून सुरू झालेल्या या मोर्चाची घुग्घूस शहरातील कारगिल चौकात सांगता झाली. सुमारे १५ किलोमीटरचा पायी प्रवास करत आंदोलकांनी आपल्या मागण्या मांडल्या. मोर्चानंतर झालेल्या सांगता सभेत बच्चू कडू यांनी पोलिसांवर टीका केली. प्रकल्पग्रस्त आंदोलकांना पोलिसांकडून नाहक त्रास दिला जात असल्याचा आरोप त्यांनी केला होता. यावेळी पोलिसांबाबत आक्षेपार्ह वक्तव्ये केल्याचाही आरोप आहे.
बच्चू कडू यांच्यासह सहा जणांवर कारवाई
पोलिसांनी या प्रकरणी बच्चू कडू यांच्यासह सहा जणांविरोधात गुन्हा नोंदविला आहे. त्यामध्ये शिवसेना शिंदे गटाचे जिल्हा संघटक मुकेश जिवतोडे, रोशन राजाराम हरबडे, अमोल नथ्थूजी मांढरे, नथ्थू भाऊराव नवले आणि सतीश बीडकर यांचा समावेश आहे. विनापरवानगी मोर्चा काढणे, बेकायदेशीर जमाव जमविणे, पोलिसांना शिवीगाळ करणे तसेच तहसीलदारांना पुलाखाली फेकण्याची धमकी दिल्याच्या आरोपांवरून ही कारवाई करण्यात आल्याची माहिती आहे.
विविध कलमांनुसार गुन्हा दाखल
या प्रकरणी भारतीय न्याय संहिता (BNS), २०२३ मधील कलम १९०, १९१(२), २९६, २२३, २२४ आणि ३५१(२), तसेच महाराष्ट्र पोलिस अधिनियम, १९५१ मधील कलम १३५ अंतर्गत गुन्हा दाखल करण्यात आला आहे.
स्थानिक भूमिपुत्रांना रोजगारात प्राधान्य मिळावे आणि प्रकल्पग्रस्तांच्या मागण्यांकडे प्रशासनाने लक्ष द्यावे, या मुद्द्यांवर हा मोर्चा काढण्यात आला होता. मात्र, मोर्चादरम्यान आणि सांगता सभेत झालेल्या कथित वक्तव्यांमुळे हे प्रकरण आता पोलिस कारवाईपर्यंत पोहोचले आहे. या प्रकरणातील आरोपांबाबत पुढील तपासातून अधिक माहिती समोर येण्याची शक्यता आहे.
Discussion about this post