छत्रपती संभाजीनगर । छत्रपती संभाजीनगर जिल्ह्यातील कन्नड आणि सोयगाव तालुक्यात नापिकी, कर्जबाजारीपणा आणि शासकीय अनुदानाच्या विलंबाला कंटाळून दोन शेतकऱ्यांनी आत्महत्या केल्याची धक्कादायक घटना उघडकीस आली आहे. या दोन्ही घटनांमुळे परिसरामध्ये मोठी हळहळ व्यक्त होत असून शेतकऱ्यांच्या आर्थिक विवंचनेचा प्रश्न पुन्हा एकदा ऐरणीवर आला आहे.
कन्नड तालुक्यात विहिरीचे अनुदान रखडल्याने शेतकऱ्याची आत्महत्या
कन्नड तालुक्यातील गव्हाली तांडा येथील ६० वर्षीय शेतकरी विठ्ठल धुमा चव्हाण यांनी आर्थिक विवंचनेतून आपले जीवन संपवले. विठ्ठल चव्हाण यांच्या कुटुंबात दोन मुले व तीन मुली असून, संपूर्ण कुटुंब शेतीवरच अवलंबून होते. त्यांच्यावर सोसायटीचे कर्ज होते. त्यांनी मागील तीन वर्षांपूर्वी पंचायत समितीच्या योजनेतून विहीर खोदली होती; परंतु विहिरीच्या बांधकामाचे २ लाख रुपयांचे शासनाचे अनुदान अद्यापही मिळाले नव्हते. अनुदानासाठी त्यांनी तीन वर्षे चकरा मारल्या, तरीही बिल निघाले नाही.
यावर्षी त्यांनी २ एकर क्षेत्रात मका पिकाची लागवड केली होती, मात्र पाण्याअभावी ती काढावी लागली. त्यानंतर त्याच क्षेत्रात कांद्याची लागवड केली, परंतु विहिरीतील पाणी आठ दिवसांतच संपल्याने कांदा पिक पूर्णपणे करपून गेले. याशिवाय, त्यांचे घरकुल गेल्या दोन वर्षांपासून मंजूर असूनही अनुदानाची रक्कम न मिळाल्यामुळे बांधकाम अपूर्ण होते. एका बाजूला कर्ज, नापिकी, विहिरीचे रखडलेले अनुदान आणि अपूर्ण घरकुल यामुळे नैराश्यात आलेल्या विठ्ठल चव्हाण यांनी हे टोकाचे पाऊल उचलले.
सोयगाव तालुक्यातही विष प्राशन करून शेतकऱ्याची जीवनयात्रा संपवली
दुसऱ्या एका घटनेत, सोयगाव तालुक्यातील सावरखेडा येथे कर्जबाजारीपणाला कंटाळून चंद्रकांत सखाराम नवगिरे या शेतकऱ्याने विष प्राशन करून जीवन संपवले. दुष्काळाच्या संकटात वाढलेल्या कर्जाच्या बोज्यामुळे त्यांनी हे टोकचे पाऊल उचलल्याची प्राथमिक माहिती आहे. विष प्राशन केल्यानंतर त्यांना तातडीने उपचारासाठी रुग्णालयात दाखल करण्यात आले होते, परंतु उपचारादरम्यान त्यांचा मृत्यू झाला. त्यांचा मृतदेह शवविच्छेदनासाठी सोयगाव ग्रामीण रुग्णालयात दाखल करण्यात आला आहे.
या दोन्ही दुर्दैवी घटनांमुळे शेतकरी वर्गामध्ये तीव्र संताप व्यक्त होत आहे. शासनाने या दोन्ही पीडित शेतकरी कुटुंबांना तातडीने आर्थिक मदत जाहीर करावी, तसेच रखडलेले विहीर आणि घरकुलाचे अनुदान तातडीने अदा करावे, अशी आक्रमक मागणी ग्रामस्थांकडून होत आहे.
Discussion about this post