अजिंठा येथील मुखपाठ फाट्याजवळ आज सोमवारी सकाळी एसटी बस आणि अवजड ट्रेलरचा भीषण अपघात झाला. पोकलेन घेऊन जाणाऱ्या ट्रेलरला एसटी बसने पाठीमागून जोरदार धडक दिल्याने बसमधील सुमारे २५ प्रवासी जखमी झाले. सुदैवाने या अपघातात कोणतीही जीवितहानी झाली नाही.
मिळालेल्या माहितीनुसार, छत्रपती संभाजीनगरकडून जळगावच्या दिशेने जाणारी एसटी बस (एमएच ०६ बीडब्ल्यू १२३६) सोमवारी सकाळी सुमारे ९ वाजता मुखपाठ फाट्याजवळ आली होती. याचवेळी पोकलेन घेऊन जाणाऱ्या अवजड ट्रेलरला (एनएल ०१ एल ७६१५) बसने पाठीमागून जोरदार धडक दिली.
अचानक झालेल्या या धडकेमुळे बसमधील प्रवाशांमध्ये एकच गोंधळ उडाला. काही प्रवाशांच्या डोक्याला, नाकाला, हाताला आणि पायाला दुखापत झाली. जखमी प्रवाशांनी मदतीसाठी आरडाओरड केल्यानंतर परिसरातील नागरिकांनी घटनास्थळी धाव घेतली.
जखमींना ग्रामीण रुग्णालयात दाखल
अपघाताची माहिती मिळताच अजिंठा पोलिस ठाण्याचे सहाय्यक पोलिस निरीक्षक पवन इंगळे यांच्या मार्गदर्शनाखाली पोलिस अंमलदार संतोष पाईकराव, संदीप कोथळकर, विलास सोनवणे, महिला पोलिस सुरेखा काळे, संजय कोळी यांच्यासह स्थानिक नागरिकांनी घटनास्थळी धाव घेतली.
जखमी प्रवाशांना तातडीने अजिंठा ग्रामीण रुग्णालयात उपचारासाठी दाखल करण्यात आले. वैद्यकीय अधीक्षक दिनाजी खंदारे, डॉ. अमोल गिरी, डॉ. महेश राठोड तसेच आरोग्य कर्मचारी सुरेश गव्हाणे, उज्वल वाघमारे, चित्रा हिरे, रोहित राव, नितीन गजबे आणि चित्रा हिरे यांनी जखमींवर उपचार सुरू केले.
वाहतूक सुरळीत करण्यासाठी पोलिसांची धावपळ
अपघातामुळे काही काळ रस्त्यावर वाहतुकीचा खोळंबा झाला होता. पोलिसांनी तत्परता दाखवत अपघातग्रस्त वाहने रस्त्याच्या बाजूला केली आणि वाहतूक सुरळीत केली.या अपघातात कोणतीही जीवितहानी न झाल्याने मोठा अनर्थ टळला. मात्र, अचानक झालेल्या धडकेमुळे बसमधील प्रवाशांमध्ये काही काळ भीतीचे वातावरण निर्माण झाले होते.
Discussion about this post