मुंबई । आयआयटी मुंबईतील द्वितीय वर्षाचा विद्यार्थी साहिल वाकोडे मृत्यू प्रकरणावरून राज्यभरात संतापाचं वातावरण पाहायला मिळत आहे. तसेच आयआयटी मुंबईचा कॅम्पसमध्ये विद्यार्थ्यांकडून आंदोलन करण्यात येत आहे. दरम्यान, या प्रकरणात आयआयटी प्रशासनाने प्रा. सुर्यनारायण डुल्ला यांना प्रशासकीय कामकाज अधिष्ठाता (अॅडमिनिस्ट्रेटिव्ह अफेअर्स डीन) या पदावरून हटवले आहे. मात्र, ही कारवाई निलंबनाची नसून केवळ प्रशासकीय जबाबदारीतून मुक्त करण्याची असल्याचे संस्थेच्या माध्यम समन्वयकांनी स्पष्ट केले आहे.
साहिल वाकोडे हा आयआयटी मुंबईमध्ये द्वितीय वर्षात शिक्षण घेत होता. १८ सप्टेंबर रोजी त्याचा मृतदेह वसतिगृहातील खोलीत आढळून आला. या घटनेनंतर विद्यार्थ्यांनी आंदोलन सुरू केले. या प्रकरणात संस्थेच्या भूमिकेवरही विद्यार्थ्यांनी प्रश्न उपस्थित केले.
घटनेनंतर आयआयटी मुंबईकडून प्रसिद्ध करण्यात आलेल्या निवेदनात साहिलला परीक्षेदरम्यान मोबाइल फोन आणि AI प्लॅटफॉर्मच्या वापरासंदर्भात पकडण्यात आल्याचा उल्लेख करण्यात आला होता. मात्र, त्यानंतर संस्थेने या निवेदनातील माहितीबाबत माफी मागत, विद्यार्थ्याच्या मृत्यूशी संबंधित परिस्थितीची चौकशी सुरू असल्याचे स्पष्ट केले. चौकशी पूर्ण होण्यापूर्वी अशा स्वरूपाची माहिती प्रसिद्ध करणे योग्य नव्हते, अशी भूमिका संस्थेने घेतली.
या प्रकरणात साहिलच्या कुटुंबीयांनी प्रा. डुल्ला आणि इतर अधिकाऱ्यांविरोधात पोलिसांत तक्रार दाखल केली आहे. आत्महत्येस प्रवृत्त करणे आणि जातिवाचक अपमान केल्याचे आरोप तक्रारीत करण्यात आल्याचे वृत्त आहे. पोलिसांनी या आरोपांच्या आधारे गुन्हा दाखल केला आहे. मात्र, जातीय भेदभाव अथवा जातिवाचक शिवीगाळ केल्याचा आरोप आयआयटी मुंबईने फेटाळला आहे.
दरम्यान, साहिलचा मृत्यू होण्याआधीच्या घटना आणि त्यावेळच्या परिस्थितीचे विवरण हे तपासाधीन आहे, संबंधित अधिकाऱ्यांकडून त्याची चौकशी होत आहे.
सध्या सुरू असलेल्या चौकशीच्या पार्श्वभूमीवर आम्ही हे सांगत आहोत की त्याचा मृत्यू होण्याआधी नेमकी काय परिस्थिती होती आणि ती परिस्थिती कशामुळे उद्भवली या घटनांचे तपशील पूर्ण चौकशीअंती जाहीर करणे हे अयोग्यच होते, असे आयआयटीने म्हटले होते.
Discussion about this post