रावेर । शहरातील छोरिया मार्केट परिसरात संशयास्पदरीत्या फिरणाऱ्या एका २० वर्षीय तरुणाला पोलिसांनी गावठी कट्टा आणि दोन जिवंत काडतुसांसह ताब्यात घेतले. रावेर पोलिसांच्या गुन्हे शोध पथकाने ही कारवाई केली. कृष्णा दत्तू पाटील (वय २०, रा. रोकडा हनुमान मंदिर नगर, रावेर) असे ताब्यात घेतलेल्या संशयिताचे नाव आहे.
पोलिसांना गुरुवारी (दि. २०) दुपारी गुप्त बातमीदारामार्फत माहिती मिळाली की, छोरिया मार्केट परिसरात एक तरुण कंबरेला बेकायदेशीर शस्त्र घेऊन फिरत आहे. माहिती मिळताच गुन्हे शोध पथकाने विलंब न करता घटनास्थळी धाव घेतली.
पोलिसांनी परिसरात सापळा रचून संशयित तरुणावर नजर ठेवली. पोलिसांची चाहूल लागताच त्याने तेथून पळून जाण्याचा प्रयत्न केला. मात्र, पोलिसांनी पाठलाग करून त्याला पकडले. पंचांसमक्ष अंगझडती घेतली असता त्याच्याकडे देशी बनावटीचा लोखंडी गावठी कट्टा आणि दोन जिवंत काडतुसे आढळून आली. पोलिसांनी सुमारे २५ हजार रुपये किमतीचा गावठी कट्टा आणि एक हजार रुपये किमतीची दोन जिवंत काडतुसे जप्त केली आहेत.
या प्रकरणी पोलीस शिपाई सुकेश तडवी यांच्या फिर्यादीवरून कृष्णा पाटील याच्याविरोधात रावेर पोलीस ठाण्यात भारतीय हत्यार कायदा कलम ३/२५ अंतर्गत गुन्हा दाखल करण्यात आला आहे. संशयिताकडे हे शस्त्र कुठून आले आणि ते बाळगण्यामागचा नेमका उद्देश काय होता, याचा तपास पोलीस करत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि फैजपूर विभागाचे पोलीस उपअधीक्षक अनिल बडगुजर यांच्या मार्गदर्शनाखाली रावेरचे पोलीस निरीक्षक संदीप पाटील, सहायक पोलीस निरीक्षक हरिदास बोचरे आणि गुन्हे शोध पथकाने केली.
Discussion about this post