जळगाव | जळगाव शहरात वाढत्या वाहनचोरीच्या घटनांवर आळा घालण्यासाठी स्थानिक गुन्हे शाखेने (एलसीबी) मोठी कारवाई करत रेकॉर्डवरील एका सराईत आरोपीला अटक केली आहे. आरोपीकडून सुमारे ३० हजार रुपये किमतीची चोरीची हिरो डिलक्स मोटारसायकल जप्त करण्यात आली असून, या कारवाईमुळे वाहनचोरीच्या आणखी काही गुन्ह्यांचा उलगडा होण्याची शक्यता पोलिसांनी व्यक्त केली आहे.
शहरातील वाहनचोरीच्या वाढत्या घटनांच्या पार्श्वभूमीवर पोलीस अधीक्षक श्रीकांत धिवरे यांनी सर्व पोलीस ठाणे आणि स्थानिक गुन्हे शाखेला विशेष मोहीम राबविण्याचे निर्देश दिले होते. त्यानुसार वरिष्ठ पोलीस निरीक्षक राहुल गायकवाड यांच्या नेतृत्वाखाली विशेष पथकाने तपास सुरू केला.
तपासादरम्यान पोलिसांना गोपनीय माहिती मिळाली की, विशाल जुलाल जाधव (रा. एरंडोल, सध्या रा. विवरे खुर्द, ता. रावेर) याच्याकडे असलेली एमएच-१९-बीटी-९४३३ क्रमांकाची हिरो डिलक्स मोटारसायकल चोरीची आहे. माहितीची खातरजमा करण्यासाठी पोलिसांनी विवरे खुर्द येथे छापा टाकून आरोपीला ताब्यात घेतले.
चौकशीदरम्यान मोटारसायकलच्या मालकीबाबत समाधानकारक माहिती देता न आल्याने पोलिसांनी सखोल चौकशी केली. त्यावेळी आरोपीने जळगाव महानगरपालिकेच्या पार्किंगमधून ही मोटारसायकल चोरी केल्याची कबुली दिली.
यानंतर जिल्हा गुन्हे अभिलेखामध्ये पडताळणी केली असता, संबंधित मोटारसायकल जळगाव शहर पोलीस ठाण्यात २०२३ मध्ये दाखल वाहनचोरीच्या गुन्ह्यातील असल्याचे स्पष्ट झाले. पोलिसांनी मोटारसायकल जप्त करून आरोपीला अटक केली आहे. पोलिसांच्या माहितीनुसार, आरोपीविरुद्ध यापूर्वीही घरफोडी आणि चोरीचे अनेक गुन्हे दाखल आहेत. तसेच इतर वाहनचोरीच्या घटनांमध्येही त्याचा सहभाग असण्याची शक्यता असून, त्या दृष्टीने अधिक तपास सुरू आहे.
Discussion about this post