धुळे | नंदुरबारहून धुळ्याकडे येत असलेल्या महाराष्ट्र राज्य मार्ग परिवहन महामंडळाच्या शिवशाही बसला मंगळवारी (२२ जुलै) दुपारी अचानक भीषण आग लागल्याने एकच खळबळ उडाली. चालक व वाहकाच्या प्रसंगावधानामुळे बसमधील सर्व ४९ प्रवाशांना सुरक्षित बाहेर काढण्यात यश आले. या घटनेत बसचे मोठ्या प्रमाणावर नुकसान झाले असून सुदैवाने कोणतीही जीवितहानी झाली नाही.
प्राथमिक माहितीनुसार, नंदुरबार-धुळे मार्गावरील शिवशाही बस (क्र. एमएच ०६ बीडब्ल्यू ०४७१) धुळ्याकडे येत असताना शहराजवळील नगाव बारी परिसरात बसच्या इंजिनाच्या भागातून अचानक धूर निघू लागला. काही क्षणांतच धुराचे आगीत रूपांतर झाले आणि संपूर्ण बसला आगीने वेढले.
धोक्याची चाहूल लागताच चालक राहुल रमेश चव्हाण यांनी प्रसंगावधान राखत बस तातडीने रस्त्याच्या कडेला उभी केली. त्यानंतर वाहक साजिद महमंद यांच्या मदतीने सर्व प्रवाशांना सुरक्षित बाहेर काढण्यात आले. काही मिनिटांतच आगीने उग्र रूप धारण करत बसचा मोठा भाग ज्वाळांच्या विळख्यात सापडला. चालक आणि वाहकाच्या तत्परतेमुळे संभाव्य मोठा अनर्थ टळला.
प्राथमिक माहितीनुसार, शॉर्टसर्किटमुळे आग लागल्याचा अंदाज व्यक्त करण्यात आला आहे. मात्र, आगीचे नेमके कारण संबंधित यंत्रणांच्या तपासानंतर स्पष्ट होणार असल्याचे अधिकाऱ्यांनी सांगितले.
घटनेची माहिती मिळताच धुळे महापालिकेच्या अग्निशमन विभागाचे पथक तातडीने घटनास्थळी दाखल झाले. वाहन चालक सिद्धार्थ खैरनार तसेच लीडिंग फायरमन पांडुरंग पाटील आणि श्याम कानडे यांनी जवानांसह शर्थीचे प्रयत्न करून आगीवर नियंत्रण मिळवले. मात्र, तोपर्यंत बसचे मोठ्या प्रमाणावर नुकसान झाले होते.
या घटनेमुळे काही काळ राष्ट्रीय महामार्गावरील वाहतूक विस्कळीत झाली होती. पोलिसांनी घटनास्थळी धाव घेत वाहतूक सुरळीत केली. या घटनेची चौकशी सुरू असून बसला आग लागण्याचे नेमके कारण शोधले जात आहे.
Discussion about this post