जळगाव | भाजपमध्ये पुनरागमनाच्या चर्चांदरम्यान राष्ट्रवादी काँग्रेस (शरद पवार गट)चे ज्येष्ठ नेते एकनाथ खडसे यांनी आपल्या राजकीय भूमिकेबाबत स्पष्ट भूमिका मांडली आहे. दिल्ली दौऱ्यादरम्यान केंद्रीय गृहमंत्री अमित शाह यांनी भाजपमध्ये येण्याची ऑफर दिल्याचा दावा करत, आपण मात्र शरद पवार यांच्या नेतृत्वातच राहणार असल्याचे खडसे यांनी स्पष्ट केले.
गेल्या काही दिवसांपासून खडसे यांच्या दिल्ली भेटीमुळे त्यांच्या घरवापसीच्या चर्चांना पुन्हा उधाण आले होते. यावर प्रतिक्रिया देताना त्यांनी, “मी स्वतःहून दिल्लीला गेलो नव्हतो. अमित शाह यांनी मला बोलावले होते. त्यांनी भाजपमध्ये येण्याबाबत विचारणा केली आणि त्यानंतर पक्षाध्यक्ष जे. पी. नड्डा यांच्याकडेही पाठवले. मात्र, मला भाजपमध्ये प्रवेश करण्यात कोणताही रस नाही. मी शरद पवार यांच्यासोबत आहे आणि पुढेही त्यांच्यासोबतच राहणार,” असे सांगितले.
तथापि, भाजपमध्ये जाण्याची इच्छा काही कार्यकर्त्यांनी व्यक्त केल्याचे नाकारता येणार नसल्याचेही त्यांनी नमूद केले.
मुख्यमंत्रीपदाच्या चर्चेत गिरीश महाजनांचे नाव
दिल्ली भेटीबाबत बोलताना खडसे यांनी मंत्री गिरीश महाजन यांच्यावरही टीका केली. महाजन हे मुख्यमंत्रीपदाच्या शर्यतीतील दावेदार असल्याचा दावा त्यांनी केला. त्यांच्या मतदारसंघात मुख्यमंत्रीपदाच्या समर्थनार्थ आशयाचे फलकही लावण्यात आले होते, असा उल्लेख त्यांनी केला.
“मी ज्यांना राजकारणात पुढे येण्यासाठी सर्वतोपरी मदत केली, त्यांच्याशी आज संघर्ष करावा लागत आहे. गिरीश महाजन मंत्री होईपर्यंत त्यांना मी नेहमीच साथ दिली. त्यांच्या मतदारसंघातील निवडणूक प्रचाराची सांगता माझ्या सभेशिवाय होत नव्हती,” असा दावाही खडसे यांनी केला.
राजकीय चर्चांना पुन्हा उधाण
राज्यात मुख्यमंत्रीपदाबाबत विविध राजकीय नेत्यांकडून वेगवेगळे दावे केले जात असतानाच खडसे यांच्या वक्तव्याने या चर्चांना आणखी चालना मिळाली आहे. मात्र, भाजपमध्ये प्रवेशाबाबत आपण कोणताही विचार करत नसल्याचे स्पष्ट करत त्यांनी शरद पवार यांच्या नेतृत्वावरील आपली निष्ठा पुन्हा अधोरेखित केली.
Discussion about this post