जळगाव । शहरातील गेंदालाल मिल परिसरामध्ये बेकायदेशीर शस्त्र बाळगून दहशत माजविणाऱ्या विजय वसंत अहिरे उर्फ भोमपाली (वय ३२) या सराईत गुन्हेगाराला स्थानिक गुन्हे शाखेच्या पथकाने अटक केली आहे. त्याच्या ताब्यातून २५ हजार रुपये किमतीचे गावठी बनावटीचे पिस्तूल हस्तगत करण्यात आले आहे.
याबाबत असे की, स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना संशयित आरोपीबाबत गोपनीय माहिती मिळाली होती. त्यानुसार पोलीस पथकाने गुरुवारी, २ जुलै रोजी गेंदालाल मिल परिसरात छापा टाकून आरोपीला ताब्यात घेतले. अटक करण्यात आलेला विजय अहिरे हा जळगाव पोलीस दलाच्या रेकॉर्डवरील सराईत गुन्हेगार असून, त्याच्यावर जळगाव शहर आणि एमआयडीसी पोलीस ठाण्यात खुनाचा प्रयत्न, दरोड्याचा प्रयत्न, सरकारी कामात अडथळा आणणे, मारहाण आणि दंगल घडवणे यांसारखे तब्बल ५८ गंभीर गुन्हे दाखल आहेत.
पोलीस निरीक्षक राहुल गायकवाड यांच्या मार्गदर्शनाखाली पोलीस उपनिरीक्षक सोपान गोरे, सहाय्यक फौजदार अतुल वंजारी, अक्रम शेख, विजय पाटील, किशोर पाटील, मुरलीधर धनगर, प्रवीण भालेराव, छगन तायडे, रविंद्र कापडे, राहुल रगडे, प्रदीप सपकाळे आदींच्या पथकाने ही कारवाई केली. या कारवाईमुळे शहरातील गुन्हेगारी वर्तुळात खळबळ उडाली असून नागरिकांनी पोलिसांच्या कामगिरीचे कौतुक केले आहे.
Discussion about this post