मुंबई | मुख्यमंत्री माझी लाडकी बहीण योजनेच्या लाभार्थी महिलांसाठी महत्त्वाची बातमी समोर येत आहे. जून महिन्याचा पहिला आठवडा संपत आला असतानाही मे महिन्याचा १५०० रुपयांचा हप्ता जमा न झाल्याने लाखो महिला प्रतीक्षेत आहेत. दरम्यान, आज होणाऱ्या राज्य मंत्रिमंडळाच्या बैठकीत या हप्त्याबाबत महत्त्वाचा निर्णय होण्याची शक्यता व्यक्त केली जात आहे.
मिळालेल्या माहितीनुसार, मुख्यमंत्री देवेंद्र फडणवीस यांच्या अध्यक्षतेखाली होणाऱ्या बैठकीत मे महिन्याचा हप्ता कधी वितरित करायचा, तसेच लाभार्थ्यांसाठी ई-केवायसी प्रक्रिया पुन्हा सुरू करायची का, यावर चर्चा होऊ शकते. त्यामुळे लाभार्थी महिलांचे लक्ष या बैठकीकडे लागले आहे.
याशिवाय समाज कल्याण विभागाकडे आवश्यक निधी वर्ग करण्याबाबतही निर्णय होण्याची शक्यता आहे. महिलांच्या खात्यात हप्ता कोणत्या तारखेला जमा करायचा, यावरही बैठकीत अंतिम शिक्कामोर्तब होऊ शकते. काही सूत्रांच्या माहितीनुसार, वट पौर्णिमेच्या पार्श्वभूमीवर जून महिन्याच्या अखेरीस हप्ता वितरित करण्याचा विचार सरकारकडून केला जात आहे.
राज्यात सध्या सुमारे १ कोटी ६६ लाख महिला या योजनेसाठी पात्र आहेत आणि त्यांना दरमहा १५०० रुपयांचा लाभ दिला जातो. विधान परिषद निवडणुकीची आचारसंहिता संपल्यानंतर निधी वितरणाला गती मिळू शकते. त्यामुळे २० जूननंतर मे महिन्याचा हप्ता लाभार्थी महिलांच्या खात्यात जमा होण्याची शक्यता वर्तवली जात आहे.
दरम्यान, राज्यातील सुमारे ८० लाख महिलांचा लाभ बंद झाल्याची चर्चा सुरू असून, त्याबाबत सरकारकडून पुढील निर्णय काय होतो, याकडेही सर्वांचे लक्ष लागले आहे. आजच्या मंत्रिमंडळ बैठकीनंतर लाडक्या बहिणी योजनेबाबतचे चित्र अधिक स्पष्ट होण्याची अपेक्षा व्यक्त केली जात आहे.
Discussion about this post