चाळीसगाव : पावसाळ्यात धबधबे, धरणे आणि तलावांच्या परिसरात पर्यटनाचा आनंद लुटण्यासाठी मोठ्या संख्येने पर्यटक गर्दी करतात. मात्र, याच उत्साहात सुरक्षेकडे दुर्लक्ष केल्यास जीवावर बेतण्याची शक्यता असते. चाळीसगाव तालुक्यातील प्रसिद्ध पाटणादेवी पर्यटनस्थळावर अशीच दुर्दैवी घटना घडली. धवलतीर्थ धबधब्याच्या पाण्यात पोहताना २३ वर्षीय तरुणाचा बुडून मृत्यू झाला.
मृत तरुणाचे नाव कृष्णा संतोष गायकवाड असून तो कन्नड येथील रहिवासी असल्याची माहिती समोर आली आहे. कृष्णा हा धवलतीर्थ धबधब्याच्या परिसरात पोहण्यासाठी गेला होता. पाण्यात पोहत असताना अचानक तो दिसेनासा झाला. काही वेळाने त्याचा शोध घेतल्यानंतर तो पाण्यात बुडाल्याचे लक्षात आले.
घटनेची माहिती मिळताच वन विभागाचे कर्मचारी आणि पोलिसांनी तातडीने घटनास्थळी धाव घेतली. तरुणाचा शोध घेण्यासाठी बचावकार्य सुरू करण्यात आले. वनपाल कैलास चव्हाण आणि राजाराम चव्हाण यांनी शोधमोहीम राबवत मृतदेह बाहेर काढण्यासाठी मदत केली. पोलिसांच्या पथकानेही घटनास्थळी पोहोचून आवश्यक कार्यवाही केली.
काही वेळाच्या प्रयत्नांनंतर कृष्णाचा मृतदेह पाण्याबाहेर काढण्यात आला. त्यानंतर मृतदेह पुढील वैद्यकीय व कायदेशीर कार्यवाहीसाठी चाळीसगाव येथील ट्रॉमा सेंटरमध्ये नेण्यात आला. या प्रकरणी पोलिसांकडून आवश्यक नोंद व कायदेशीर प्रक्रिया सुरू करण्यात आली होती.
दरम्यान, पावसाळ्यात धबधबे आणि पर्यटनस्थळांवर पाण्याचा प्रवाह वाढतो. त्यासोबतच दगड घसरडे होणे, पाण्याची खोली अचानक वाढणे आणि प्रवाहाचा अंदाज न येणे यामुळे दुर्घटनेचा धोका वाढतो. त्यामुळे पर्यटकांनी पर्यटनाचा आनंद घेताना सुरक्षिततेला प्राधान्य द्यावे, प्रशासनाच्या सूचनांचे पालन करावे आणि धोकादायक ठिकाणी पोहणे अथवा जाणे टाळावे, असे आवाहन करण्यात आले आहे.
Discussion about this post