जळगाव । जळगाव शहरातील जोशी कॉलनी (जोशीपेठ) परिसरात एका मंदिरात इलेक्ट्रिक फिटिंगचे काम सुरू असताना विजेचा जोरदार धक्का लागून १९ वर्षीय कोवळ्या तरुणाचा दुर्दैवी मृत्यू झाल्याची धक्कादायक घटना आज शनिवारी घडली. या घटनेमुळे परिसरात हळहळ व्यक्त केली जात असून, तरुणाच्या मृत्यूने कुटुंबावर दुःखाचा डोंगर कोसळला आहे. मुस्तकीम आसिफ भैय्या पटेल (वय १९, रा. मासूमवाडी, जळगाव) असे मृत पावलेल्या तरुणाचे नाव आहे.
मिळालेल्या माहितीनुसार, मुस्तकीम हा गेल्या सुमारे २० दिवसांपासून एका ठेकेदाराकडे इलेक्ट्रिक कामगार म्हणून काम करत होता. शनिवारी जोशीपेठ येथील एका मंदिरात इलेक्ट्रिक फिटिंगचे काम अंतिम टप्प्यात आले होते. मुस्तकीम मंदिरात उंचावर विद्युत वायर जोडण्याचे काम करत असताना, अचानक विद्युत प्रवाह सुरू झाला. यामुळे मुस्तकीमला विजेचा अतिशय तीव्र धक्का बसला आणि तो उंचावरून थेट खाली कोसळला.
त्याच्यासोबत काम करणाऱ्या सहकाऱ्यांनी त्याला तातडीने जिल्हा शासकीय वैद्यकीय महाविद्यालय व रुग्णालयात उपचारासाठी दाखल केले. मात्र, तपासणीनंतर वैद्यकीय अधिकाऱ्यांनी त्याला मृत घोषित केले.
मुस्तकीमच्या कुटुंबाची आर्थिक परिस्थिती अत्यंत बेताची आहे. त्याचे वडील मसाले विक्रीचा व्यवसाय करून कुटुंबाचा उदरनिर्वाह चालवतात. त्याच्या पश्चात आई, वडील, एक भाऊ आणि एक बहीण असा परिवार आहे. कुटुंबातील एका तरुण आणि कमावत्या मुलाचा असा अचानक मृत्यू झाल्याने रुग्णालयात कुटुंबीय, नातेवाईक आणि मित्रांनी एकच आक्रोश केला. या घटनेमुळे मासूमवाडी परिसरात मोठी शोककळा पसरली आहे.
Discussion about this post