पुणे : गणेशोत्सवातील डीजे आणि ध्वनीप्रदूषणाच्या मुद्द्यावरून पुण्यात सुरू असलेल्या वादाला आता हिंसक वळण लागले आहे. डीजेच्या मोठ्या आवाजामुळे सर्वसामान्य नागरिकांना त्रास होऊ नये, अशी भूमिका मांडणारे सामाजिक कार्यकर्ते विद्यानंद बापट यांना टिळक रोड परिसरात मारहाण करण्यात आली. विशेष म्हणजे, एका वृत्तवाहिनीशी संवाद साधत असतानाच त्यांच्यावर हल्ला झाला. या घटनेचा प्रकार कॅमेऱ्यात कैद झाला आहे.
गणेशोत्सवात डीजेच्या वापरावरून पुण्यात सध्या मोठा वाद सुरू आहे. ध्वनीप्रदूषणाच्या नियमांचे पालन करूनच डीजे वाजवावा, तसेच त्याचा सर्वसामान्य नागरिकांना त्रास होणार नाही, याची काळजी घेतली पाहिजे, अशी भूमिका विद्यानंद बापट यांनी मांडली होती. त्यांच्या या भूमिकेमुळे ते चर्चेत आले होते.
दरम्यान, आज एका मराठी वृत्तवाहिनीशी याच विषयावर संवाद साधत असताना अचानक एक तरुण त्यांच्या जवळ आला आणि त्याने बापट यांना मारहाण करण्यास सुरुवात केली. अचानक घडलेल्या या प्रकारामुळे काही काळ परिसरात गोंधळ निर्माण झाला. त्यानंतर उपस्थित असलेल्या काही नागरिकांनी हस्तक्षेप करत संबंधित तरुणाला रोखले.
‘सवंग प्रसिद्धीसाठी हल्ला’
मारहाणीनंतर विद्यानंद बापट यांनी या घटनेवर प्रतिक्रिया दिली. अचानक आलेल्या एका व्यक्तीने आपल्यावर हल्ला केल्याचे त्यांनी सांगितले. पोलिसांची उपस्थिती असूनही त्यांच्याकडे शस्त्र नसल्याचे पाहून हल्ला करण्यात आल्याचा आरोपही बापट यांनी केला.हा प्रकार केवळ सवंग प्रसिद्धीसाठी करण्यात आल्याचे सांगत बापट यांनी हल्लेखोरावर टीका केली.
दरम्यान, या मारहाणीप्रकरणी पोलिसांत तक्रार करणार का, असा प्रश्न विद्यानंद बापट यांना विचारण्यात आला. त्यावर ‘हो, मी पोलिसात तक्रार दाखल केली आहे. ते आले आहेत,’ असे त्यांनी स्पष्ट केले. त्यामुळे आता या प्रकरणी पोलिसांकडून पुढील कारवाई काय केली जाते, याकडे लक्ष लागले आहे.गणेशोत्सवातील डीजे, ध्वनीप्रदूषण आणि नागरिकांच्या तक्रारींच्या पार्श्वभूमीवर सुरू असलेल्या या वादात मारहाणीची घटना घडल्याने पुण्यातील वातावरण पुन्हा चर्चेत आले आहे.
Discussion about this post