जामनेर । जामनेर शहरातून एक अतिशय दुःखद घटना समोर आली आहे. शहरातील सोनबर्डी परिसरातील एका जलतरण तलावात (स्विमिंग पूल) बुडून अवघ्या ७ वर्षांच्या चिमुकल्याचा मृत्यू झाला आहे. कार्तिक ऊर्फ उत्कर्ष गणेश पाटील असे मृत बालकाचे नाव असून या दुर्दैवी घटनेमुळे संपूर्ण परिसरात तीव्र शोककळा पसरली असून पाटील कुटुंबावर दुःखाचा डोंगर कोसळला आहे.
मिळालेल्या प्राथमिक माहितीनुसार, चिमुकला कार्तिक हा मूळचा एकुलती येथील रहिवासी असून सध्या तो आपल्या कुटुंबासह जामनेरमधील दर्शन पार्क परिसरात राहत होता. रविवार, ३ मे रोजी सायंकाळच्या सुमारास तो आपल्या कुटुंबीयांसोबत सोनबर्डी येथील तरण तलावावर पोहण्यासाठी गेला होता.
पोहून झाल्यानंतर कार्तिकच्या वडिलांनी त्याला स्विमिंग पूलजवळील आऊटलेट चेंबरपाशी काही वेळ थांबवले आणि ते स्वतःचे कपडे बदलण्यासाठी व त्याचे कपडे आणण्यासाठी जवळच गेले. मात्र, वडील गेल्यानंतर अवघ्या काही क्षणांतच कार्तिकचा पाय घसरून तोल गेला आणि तो चेंबरमध्ये पडला. चेंबरमध्ये पाणी असल्याने तो त्यात बुडाला. वडिलांनी बाहेर आल्यावर कार्तिक तिथे नसल्याचे पाहिले. त्यांनी आणि स्थानिकांनी तातडीने शोध सुरू केला. कार्तिक चेंबरमध्ये पडल्याचे लक्षात येताच स्थानिकांनी त्याला तात्काळ बाहेर काढले.
त्याला तातडीने जवळच्या रुग्णालयात दाखल करण्यात आले, मात्र रुग्णालयात पोहोचण्यापूर्वीच त्याचा मृत्यू झाला होता. डॉक्टरांनी तपासणी करून त्याला मृत घोषित केले.या घटनेची माहिती मिळताच स्थानिक पोलिसांनी तातडीने घटनास्थळ गाठले. या प्रकरणी संबंधित पोलीस ठाण्यात अकस्मात मृत्यूची नोंद करण्यात आली असून पोलीस पुढील तपास करत आहेत.
Discussion about this post