मुंबई । राज्यात पावसाने दीर्घ दडी मारल्यामुळे निर्माण झालेल्या गंभीर दुष्काळी परिस्थितीच्या पार्श्वभूमीवर राज्य सरकारकडून एक अत्यंत दिलासादायक बातमी समोर आली आहे. दुष्काळ जाहीर करण्यासंदर्भातील शासन निर्णय (GR) उद्या जाहीर करण्यात येणार असल्याची मोठी घोषणा मुख्यमंत्री देवेंद्र फडणवीस यांनी आज केली आहे. सध्या मुख्यमंत्री मराठवाडा आणि विदर्भातील दुष्काळग्रस्त जिल्ह्यांचा प्रत्यक्ष दौरा करत असून, शेतकऱ्यांना सर्वतोपरी मदत केली जाईल, अशी ग्वाही त्यांनी दिली आहे.
मुख्यमंत्र्यांच्या दौऱ्यात समोर आली भीषण परिस्थिती
राज्यात गेल्या दीड महिन्यापासून पाऊस न पडल्यामुळे खरीप हंगाम धोक्यात आला असून अनेक भागांत उन्हामुळे पिकं करपून गेली आहेत. काही ठिकाणी शेतकऱ्यांनी शेतात ट्रॅक्टर फिरवला, तर काहींनी जळून गेलेली पिके फेकून दिली आहेत. राज्यभरातून दुष्काळ जाहीर करण्याची मागणी तीव्र झाल्याने मुख्यमंत्री देवेंद्र फडणवीस यांनी स्वतः मराठवाडा आणि विदर्भातील दुष्काळग्रस्त भागाचा दौरा सुरू केला आहे.
आज मुख्यमंत्र्यांनी वाशिम जिल्ह्यातील कारंजा लाड तालुक्यातील गावांना भेट देऊन प्रत्यक्ष पाहणी केली आणि शेतकऱ्यांशी संवाद साधला. या दौऱ्यादरम्यान जलसाठे कोरडे पडल्याचे, जनावरांच्या चाऱ्याचा आणि पिण्याच्या पाण्याचा प्रश्न किती गंभीर बनला आहे, हे त्यांच्या निदर्शनास आले.
मुख्यमंत्र्यांच्या प्रमुख घोषणा आणि दिलासा
दौऱ्यादरम्यान माध्यमांशी बोलताना मुख्यमंत्री देवेंद्र फडणवीस म्हणाले की, “उद्याच कोरडा दुष्काळाचा जीआर काढण्यात येणार आहे. राज्यातील सर्व बाधित शेतकऱ्यांना सरसकट मदत केली जाईल. तसेच, या संकटात सापडलेल्या शेतकऱ्यांना नियमांनुसार विम्याचे पैसे देखील दिले जातील.”
मुख्यमंत्र्यांच्या या घोषणेमुळे राज्यातील चिंतेत असलेल्या शेतकरी वर्गाला मोठा दिलासा मिळण्याची शक्यता आहे. मात्र, या कठीण काळात जनावरांसाठी चारा छावण्या सुरू करणे आणि इतर मागण्यांसंदर्भात सरकार नेमके काय पावले उचलणार, याकडे आता संपूर्ण राज्याचे लक्ष लागले आहे.
Discussion about this post