12वी पास उमेदवारांसाठी सरकारी नोकरीची संधी; SSC कडून 2,536 पदांची भरती

सरकारी नोकरीच्या तयारीत असलेल्या 12वी उत्तीर्ण उमेदवारांसाठी महत्त्वाची बातमी आहे. स्टाफ सिलेक्शन कमिशन (SSC) ने विविध पदांवर भरती प्रक्रिया सुरू केली असून यामध्ये तब्बल 2,536 रिक्त जागा भरल्या जाणार आहेत. त्यामुळे बारावी उत्तीर्ण तरुण-तरुणींना केंद्र सरकारच्या विविध विभागांमध्ये नोकरी मिळवण्याची संधी उपलब्ध झाली आहे.

कोणती पदे भरली जाणार?
या भरतीमध्ये डेटा एंट्री ऑपरेटर (DEO), डेटा एंट्री ऑपरेटर ग्रेड ‘A’, कनिष्ठ विभाग लिपिक (LDC) आणि कनिष्ठ सचिवालय सहाय्यक (JSA) या पदांचा समावेश आहे. उमेदवारांची निवड SSC च्या Tier-I आणि Tier-II परीक्षेच्या माध्यमातून केली जाणार आहे.

भरतीसाठी पात्रता काय?
डेटा एंट्री ऑपरेटर (DEO) आणि DEO ग्रेड ‘A’ पदासाठी अर्ज करणाऱ्या उमेदवाराने 12वीमध्ये गणित विषयासह उत्तीर्ण असणे आवश्यक आहे. तर LDC/JSA पदासाठी कोणत्याही शाखेतून 12वी उत्तीर्ण असलेले उमेदवार पात्र ठरणार आहेत.

या भरतीसाठी उमेदवाराचे वय 1 ऑगस्ट 2026 रोजी 18 ते 27 वर्षांच्या दरम्यान असावे. आरक्षित प्रवर्गातील उमेदवारांना शासनाच्या नियमानुसार वयोमर्यादेत सवलत मिळणार आहे. SC/ST उमेदवारांना 5 वर्षे, तर OBC उमेदवारांना 3 वर्षांची वयोमर्यादा सवलत देण्यात येणार आहे.

भरतीसाठी अर्ज प्रक्रिया ऑनलाइन पद्धतीने होणार आहे. General आणि OBC प्रवर्गातील उमेदवारांना 100 रुपये अर्ज शुल्क भरावे लागेल. मात्र SC, ST, PWD, Ex-Servicemen तसेच सर्व महिला उमेदवारांना अर्ज शुल्कातून सूट देण्यात आली आहे.

अर्जासाठी महत्त्वाच्या तारखा

उमेदवारांना या भरतीसाठी 7 ऑक्टोबर 2026 रोजी रात्री 11 वाजेपर्यंत ऑनलाइन अर्ज करता येणार आहे. अर्ज भरताना झालेल्या चुका दुरुस्त करण्यासाठी 14 ते 16 ऑक्टोबर 2026 दरम्यान दुरुस्तीची संधी दिली जाणार आहे. Tier-I आणि Tier-II परीक्षेच्या तारखा SSC कडून स्वतंत्रपणे जाहीर केल्या जातील.

SSC च्या या भरतीमध्ये पदानुसार वेगवेगळी वेतनश्रेणी निश्चित करण्यात आली आहे. डेटा एंट्री ऑपरेटर (DEO) पदासाठी Pay Level-4 मध्ये 25,500 ते 81,100 रुपये, तर Pay Level-5 मध्ये 29,200 ते 92,300 रुपये वेतनश्रेणी आहे. डेटा एंट्री ऑपरेटर, ग्रेड ‘A’ पदासाठी Pay Level-4 नुसार 25,500 ते 81,100 रुपये वेतन मिळणार आहे.

त्याचप्रमाणे कनिष्ठ विभाग लिपिक (LDC) / कनिष्ठ सचिवालय सहाय्यक (JSA) पदासाठी Pay Level-2 नुसार 19,900 ते 63,200 रुपये वेतनश्रेणी आहे.