तुम्हीही सरकारी बँकेत नोकरी मिळवण्याचे स्वप्न पाहत असाल आणि दिवस-रात्र एक करून परीक्षेच्या तयारीत व्यस्त असाल, तर ही बातमी तुमच्यासाठी अत्यंत आनंदाची आहे. देशातील सर्वात मोठी बँक असलेल्या स्टेट बँक ऑफ इंडियाने (SBI) क्लार्क कॅडरमध्ये ज्युनियर असोसिएट (कस्टमर सपोर्ट अँड सेल्स) पदांवर तब्बल ९,१२४ जागांसाठी महाभरती जाहीर केली आहे.
SBI बँकेने एकूण ९,१२४ जागांचा समावेश केला आहे. यामध्ये ७,६८० पदे ही रेगुलर व्हेकन्सी (नियमित भरती) अंतर्गत भरली जाणार आहेत, तर उर्वरित १,४४४ पदे ही बॅकलॉग व्हेकन्सी (मागील अनुशेष) म्हणून काढण्यात आली आहेत. ही सर्व पदे देशातील विविध राज्ये आणि केंद्रशासित प्रदेशांमधील एसबीआयच्या शाखांसाठी विभागण्यात आली आहेत. एवढ्या मोठ्या प्रमाणावर जागा उपलब्ध झाल्यामुळे बँक भरतीची तयारी करणाऱ्या उमेदवारांसाठी निवडीची संधी अनेक पटींनी वाढली आहे.
या पदांसाठी कोणत्याही मान्यताप्राप्त विद्यापीठातून कोणत्याही शाखेतील पदवीधर (Graduation) असलेले उमेदवार अर्ज करू शकतात. तसेच पदवीच्या अंतिम वर्षात शिकणारे विद्यार्थीही या भरतीसाठी पात्र ठरतील. उमेदवाराचे वय २० ते २८ वर्षांच्या दरम्यान असावे. नियमानुसार आरक्षित प्रवर्गातील उमेदवारांना कमाल वयोमर्याधेत सवलत दिली जाईल.
अर्जाची पद्धत आणि अंतिम मुदत
इच्छुक व पात्र उमेदवारांना एसबीआयच्या अधिकृत वेबसाइटवर (sbi.co.in किंवा sbi.bank.in/web/careers) जाऊन ऑनलाईन अर्ज करावा लागेल. अर्जाची प्रक्रिया सुरू झाली असून ३१ ऑगस्ट ही अर्ज करण्याची अंतिम तारीख आहे.
उमेदवारांची निवड ऑनलाईन पूर्व परीक्षा (Prelims), मुख्य परीक्षा (Mains) आणि स्थानिक भाषा चाचणीच्या (LPT) आधारे केली जाईल. त्यामुळे कोणतीही वेळ न दवडता पात्र उमेदवारांनी तात्काळ आपला ऑनलाईन अर्ज दाखल करावा.
Discussion about this post