SBI ग्राहकांनो, 1 ऑक्टोबरपासून खिशाला लागणार कात्री; ATMचे शुल्क वाढले

मुंबई : स्टेट बँक ऑफ इंडिया (SBI)च्या ग्राहकांसाठी महत्त्वाची बातमी आहे. बँकेने बेसिक सेव्हिंग्स बँक डिपॉझिट (BSBD) खातेधारकांसाठी रोख रक्कम काढण्याच्या शुल्कात बदल करण्याचा निर्णय घेतला आहे. 1 ऑक्टोबरपासून महिन्यातील पहिल्या चार रोख व्यवहारांनंतर प्रत्येक अतिरिक्त कॅश विड्रॉव्हलसाठी 15 रुपये अधिक जीएसटी शुल्क आकारले जाणार आहे.

चार व्यवहार मोफत, त्यानंतर शुल्क

सध्या BSBD खातेधारकांना महिन्यातील पहिल्या चार रोख व्यवहारांसाठी कोणतेही शुल्क आकारले जात नाही. या व्यवहारांमध्ये SBIच्या शाखेतून रोख रक्कम काढणे तसेच SBI किंवा इतर बँकांच्या ATMमधून पैसे काढणे यांचा समावेश होतो. आतापर्यंत चार मोफत व्यवहारांची मर्यादा संपल्यानंतर प्रत्येक अतिरिक्त कॅश विड्रॉव्हलसाठी 10 रुपये अधिक लागू GST आकारला जात होता. मात्र, 1 ऑक्टोबरपासून हे शुल्क वाढून 15 रुपये अधिक GST होणार आहे.

महत्त्वाचे म्हणजे, ग्राहकांना मिळणाऱ्या चार मोफत व्यवहारांच्या संख्येत कोणताही बदल करण्यात आलेला नाही. म्हणजेच महिन्यातील पहिल्या चार पात्र रोख व्यवहारांसाठी ग्राहकांना शुल्क द्यावे लागणार नाही. पाचव्या आणि त्यानंतरच्या व्यवहारांवरच वाढीव शुल्क लागू होईल.ATMमधील व्यवहार अयशस्वी झाल्यास किंवा केवळ बॅलन्स तपासणीसारख्या गैर-आर्थिक व्यवहारांवर हे शुल्क लागू होणार नसल्याचे बँकेच्या नियमांनुसार स्पष्ट करण्यात आले आहे.

चेकबुकच्या शुल्कातही बदल

BSBD खातेधारकांसाठी चेकबुकच्या शुल्कातही बदल करण्यात येणार आहे. आर्थिक वर्षातील सुरुवातीची 10 चेक पाने मोफत मिळतील. त्यानंतर 10 पानांच्या चेकबुकसाठी 40 रुपये अधिक GST, तर 25 पानांच्या चेकबुकसाठी 75 रुपये अधिक GST शुल्क आकारले जाणार आहे. ज्येष्ठ नागरिकांना या चेकबुक शुल्कातून सूट देण्यात आली आहे.

ग्राहकांनी काय करावे?

अतिरिक्त शुल्क टाळण्यासाठी ग्राहकांनी महिन्यातील रोख व्यवहारांचे नियोजन करणे फायदेशीर ठरणार आहे. शक्य असल्यास रोख रकमेऐवजी UPI, इंटरनेट बँकिंग आणि मोबाइल बँकिंग यांसारख्या डिजिटल माध्यमांचा वापर केल्यास अतिरिक्त कॅश विड्रॉव्हल शुल्क टाळता येऊ शकते.