जळगाव । आजघडीला फसवणुकीचे अनेक प्रकार समोर येत आहेत. यात सायबर गुन्हेगारी अधिक प्रमाणात वाढली आहे. तर काहीजण व्यवहार करून फसवणूक करत असतात. मात्र जळगाव शहरात एका सराफ व्यावसायिकाला त्याच्याकडे असलेल्या कामगारानेच फसवणूक केल्याचे समोर आले आहे. सराफा व्यापाराचा विश्वासघात करून ऑर्डरचे असलेले ९७ हजार ५०० रुपयांचे सोन्याच्या मणींचा परस्पर अपहार करून फसवणूक झाली. या प्रकरणी शनिपेठ पोलिस ठाण्यात एकावर गुन्हा दाखल करण्यात आला आहे.
जळगाव शहरातील श्रीकृष्णनगरातील अंकुश पुंडलिक सोनवणे (वय ३२) हे सोने खरेदी- विक्रीचा व्यवसाय करतात. दरम्यान ऑगस्ट महिन्यात त्यांच्या ओळखीतला जळगावतीलच योगेश भगवान गोयर (वय ३२) याच्याकडे विश्वासाने ऑर्डरचे असलेले ९७ हजार ५०० रुपयांचे १३ ग्रॅम वजनाचे ७८ सोन्याचे मनी सोपवून सराफा मार्केटमधील अहिरराव मनीवाले यांच्याकडे देण्यास सांगितले होते. मालकाने मोठ्या विश्वासाने सोन्याचे मनी दिले होते.
मात्र, योगेश गोयल याने ऑर्डरची डिलिव्हरी न करता अपहार करून हे सोन्याचे मनी परस्पर विक्री करून टाकली होती. याबाबत अंकुश सोनवणे यास काहीही माहिती नव्हते. मात्र दिलेली ऑर्डर संबंधित ठिकाणी न पोहचल्याने फसवणूक झाल्याचे लक्षात आले. यासंदर्भात अंकुश सोनवणे यांनी बुधवारी (ता. २७) दिलेल्या फिर्यादीवरून शनिपेठ पोलिस ठाण्यात संशयित योगेश भगवान गोयल याच्याविरोधात फसवणुकीचा गुन्हा दाखल करण्यात आला आहे. सहाय्यक फौजदार रघुनाथ पवार तपास करीत आहे.
Discussion about this post