मुंबई । कर्जत येथे सुरू असलेल्या वृक्षतोडीच्या मुद्द्यावरून राजकीय वातावरण तापले असून, शिवसेना (ठाकरे गट) नेते संजय राऊत यांनी ज्येष्ठ वकील उज्ज्वल निकम यांच्यावर जोरदार टीका केली आहे. उज्ज्वल निकम हे सरकारच्या बाजूने उभे राहून पर्यावरणाला हानी पोहोचवणाऱ्या प्रकल्पाचे समर्थन करत असल्याचा आरोप राऊत यांनी केला. “१० झाडे तोडणे म्हणजे एक कसाब आहे. आम्ही झाडे आणि कसाब यांना एकाच तराजूत तोलतो,” असे वादग्रस्त विधान करत त्यांनी निकम यांच्यावर निशाणा साधला. माध्यमांशी संवाद साधताना राऊत यांनी ही टीका केली.
उज्ज्वल निकम यांच्याबद्दल आम्हाला आदर आहे. ते आमचे मित्र आहेत; मात्र, एका खासदारकीसाठी त्यांनी आपल्या अब्रूची लक्तरे काढली आहेत, अशी टीका संजय राऊत यांनी केली. निकम हे भाजपच्या बाजूने उभे राहत असून, पर्यावरणाचा ऱ्हास करणाऱ्यांचे समर्थन करणे दुर्दैवी असल्याचे ते म्हणाले.
कसाब प्रकरणात मानवतावादाची भूमिका मांडणाऱ्या निकम यांनी आता पर्यावरणाच्या मुद्द्यावरही संवेदनशील भूमिका घ्यायला हवी होती, असे राऊत म्हणाले. भाजप चांगल्या व्यक्तींचा राजकीय वापर करून घेत असल्याचा आरोपही त्यांनी केला.
‘अदानींसाठी जंगलांवर कुऱ्हाड का?’
चंद्रपूरमध्ये अदानी समूहाला खाणी दिल्या जात असल्याचा आरोप करत संजय राऊत यांनी राज्य सरकारवरही टीका केली. छत्तीसगडमध्ये जंगलांचा ऱ्हास होत असल्याचा मुद्दा उपस्थित करत त्यांनी विदर्भातील जंगल आणि व्याघ्र प्रकल्पांच्या संरक्षणाचा प्रश्न उपस्थित केला.
विदर्भातील जंगलसंपत्ती आणि व्याघ्र प्रकल्पांचे महत्त्व लक्षात घेता, विकासाच्या नावाखाली हजारो झाडांची कत्तल होऊ नये, अशी भूमिका त्यांनी मांडली. विदर्भाचे सुपुत्र असलेल्या मुख्यमंत्री देवेंद्र फडणवीस यांनी या वृक्षतोडीला विरोध करावा, असे आवाहनही त्यांनी केले. माजी मंत्री सुधीर मुनगंटीवार यांनी या मुद्द्यावर आंदोलन करावे, आम्ही त्यांना साथ देऊ, असेही राऊत म्हणाले. “आम्हाला उद्योगपती हवेत; पण ते महाराष्ट्र उभा करणारे हवेत. टाटा, बिर्ला आणि किर्लोस्कर यांच्यासारख्या उद्योगपतींनी महाराष्ट्राचे वैभव वाढवले. राज्याच्या पर्यावरणाचा ऱ्हास करणारे उद्योग आम्हाला नकोत,” अशी भूमिका त्यांनी मांडली.
‘आदिवासींना बळ द्या’
कर्जतमधील वृक्षतोडीविरोधातील आंदोलनाला पाठिंबा देताना संजय राऊत यांनी आरे येथील आंदोलनाचाही उल्लेख केला. आरेमधील आंदोलन संपलेले नसून, आता कर्जतमध्येही आंदोलन सुरू झाले आहे. भविष्यात विदर्भातही या मुद्द्यावर आंदोलनाची ठिणगी पडू शकते, असा इशारा त्यांनी दिला. आदित्य ठाकरे या आंदोलनाचे नेतृत्व करत असल्याचे सांगत राऊत यांनी इतर राजकीय पक्ष आणि पर्यावरणप्रेमींनाही आंदोलनात सहभागी होण्याचे आवाहन केले. तसेच, वृक्षतोडीविरोधात लढणाऱ्या आदिवासींना पाठिंबा देण्याची भूमिका त्यांनी मांडली.कर्जतमधील वृक्षतोडीचा मुद्दा आता पर्यावरणापुरता मर्यादित न राहता राजकीय संघर्षाचा विषय बनला आहे. या प्रकरणावरून संजय राऊत यांनी सरकार, भाजप आणि उज्ज्वल निकम यांच्यावर केलेल्या टीकेमुळे आगामी काळात हा वाद आणखी चिघळण्याची शक्यता आहे.
Discussion about this post