रावेर । धरणातून गाळ काढण्याच्या कामाच्या मोबदल्यात लाचेची मागणी केल्याप्रकरणी रावेर वनपरिक्षेत्रातील वनरक्षक एसीबीच्या जाळ्यात अडकला आहे. मंगरूळ धरणातून जेसीबीच्या साहाय्याने गाळ काढण्याच्या कामासाठी २० हजार रुपये स्वीकारताना वनरक्षकाला जळगाव लाचलुचपत प्रतिबंधक विभागाच्या पथकाने रंगेहाथ पकडले. रावेर-बऱ्हाणपूर मार्गावरील एका ज्यूस सेंटरमध्ये ही कारवाई करण्यात आली.
जगदीश काशिनाथ जगदाळे (वय २७) असे ताब्यात घेण्यात आलेल्या वनरक्षकाचे नाव आहे. या कारवाईमुळे रावेर तालुक्यात खळबळ उडाली असून, सरकारी कामाच्या मोबदल्यात लाचेची मागणी केल्याचा प्रकार समोर आला आहे.
या प्रकरणातील तक्रारदार रावेर येथे अर्थमूव्हर्स एजन्सी चालवतात. त्यांच्याकडे स्वतःचे जेसीबी मशीन आहे. तक्रारदाराच्या परिचित व्यक्तीने मंगरूळ धरणातून शेतीच्या उपयोगासाठी गाळ काढणे आणि त्याची वाहतूक करण्यासाठी पाटबंधारे उपविभागाकडून परवानगी घेतली होती. संबंधित ठिकाण वनरक्षक जगदाळे यांच्या कार्यक्षेत्रात येत असल्याने या कामाच्या अनुषंगाने लाचेची मागणी झाल्याचा आरोप आहे.
तक्रारदाराच्या जेसीबी मशीनद्वारे गाळ काढण्याच्या कामासाठी २० हजार रुपये, तर परिचित व्यक्तीच्या ट्रॅक्टरद्वारे गाळ वाहून नेण्याच्या मोबदल्यात ३० हजार रुपये, अशी एकूण ५० हजार रुपयांची मागणी करण्यात आल्याचे तक्रारीत नमूद होते. यानंतर तक्रारदाराने जळगाव एसीबी कार्यालयाशी संपर्क साधून याबाबत तक्रार केली.
तक्रारीची पडताळणी करून सापळा
तक्रारीची दखल घेत एसीबीच्या पथकाने बुधवारी रावेर शहरातील छोरिया मार्केट परिसरात पंचांच्या उपस्थितीत लाचेच्या मागणीची पडताळणी केली. यावेळी जेसीबीद्वारे गाळ काढण्याच्या कामासाठी २० हजार रुपये मागितल्याचे आणि संबंधित रक्कम स्वीकारण्याची तयारी दर्शविल्याचे तपासात निष्पन्न झाले.
यानंतर एसीबीच्या पथकाने रावेर-बऱ्हाणपूर रस्त्यावरील एका ज्यूस सेंटर परिसरात सापळा रचला. ठरल्याप्रमाणे तक्रारदाराकडून २० हजार रुपयांची रक्कम स्वीकारताना वनरक्षक जगदाळे यांना पथकाने पकडले. त्यानंतर त्यांना ताब्यात घेण्यात आले.
ही कारवाई जळगाव लाचलुचपत प्रतिबंधक विभागाचे पोलीस उपअधीक्षक योगेश ठाकूर यांच्या मार्गदर्शनाखाली आणि पोलीस निरीक्षक हेमंत नागरे यांच्या नेतृत्वाखाली करण्यात आली. या प्रकरणी रावेर पोलीस ठाण्यात गुन्हा दाखल करण्याची प्रक्रिया सुरू होती.धरणातून गाळ काढण्यासारख्या कामात लाचेची मागणी झाल्याचा प्रकार उघडकीस आल्याने परिसरात या कारवाईची चर्चा सुरू आहे.
Discussion about this post