पाचोरा : अन्न व औषध प्रशासनाला प्राप्त झालेल्या माहितीच्या आधारे पाचोरा तालुक्यातील भोकरी, वरखेडी-पिंपळगाव रोड, भवरखेड येथील मे. श्री महासर माता राईस मिलवर दि. ७ ते ९ सप्टेंबरदरम्यान अचानक तपासणी करण्यात आली. या कारवाईत महाराष्ट्र राज्याच्या सार्वजनिक वितरण व्यवस्थेशी संबंधित असल्याचा संशय असलेला फोर्टीफाइड तांदूळ आढळून आल्याने तब्बल २ लाख ९६ हजार ४७६ किलो तांदूळ, किंमत ७८ लाख ६३ हजार १५० रुपये, असा साठा संशयावरून जप्त करण्यात आला.
तपासणीदरम्यान आस्थापनेतून अन्नाचे सहा नमुने घेण्यात आले. जप्त करण्यात आलेल्या साठ्यामध्ये ६४ हजार ५४६ किलो फोर्टीफाइड राईस, १ लाख ३७ हजार ९९६ किलो ब्रोकन राईस, १ हजार ९९६ किलो प्लेन राईस (डोमेस्टिक पर्पज) विनालेबल, ३ हजार ४४६ किलो ब्रोकन राईस (डोमेस्टिक पर्पज) मिसब्रँडेड, तसेच ८१ हजार ४९६ किलो राईस (Gustolo’s) एक्सपोर्ट आणि ६ हजार ९९६ किलो राईस (५% ब्रोकन) मलेशिया एक्सपोर्ट यांचा समावेश आहे.
संबंधित आस्थापना केंद्रीय अन्न परवानाधारक असल्याने या प्रकरणाची माहिती केंद्रीय अन्न परवाना प्राधिकरणास देण्यात आली आहे. जप्त करण्यात आलेला फोर्टीफाइड तांदूळ महाराष्ट्र राज्याच्या सार्वजनिक वितरण व्यवस्थेशी संबंधित आहे किंवा नाही, याबाबत अन्न सुरक्षा अधिकाऱ्यांकडून पुढील तपासणी सुरू आहे.
दरम्यान, तपासणीमध्ये राईस मिलमध्ये उंदराची विष्ठा, धूळ, कोळ्यांची जाळी आढळून आली. तसेच तांदूळ जमिनीवर साठवून ठेवणे, तांदळाच्या पोत्यांवर उत्पादकाचा पत्ता नमूद नसणे आणि खरेदीची बिले सादर न करणे आदी गंभीर त्रुटीही निदर्शनास आल्या. या अनुषंगाने अन्न सुरक्षा व मानके अधिनियमांतर्गत पुढील कार्यवाही करण्यात येत आहे.
ही कारवाई अन्न व औषध प्रशासनाचे आयुक्त तुकाराम मुंढे, जिल्हाधिकारी रोहन घुगे, सह आयुक्त (अन्न), ठाणे विभाग एस. एस. जाधव आणि सह आयुक्त (अन्न), नाशिक विभाग मंगेश माने यांच्या मार्गदर्शनाखाली करण्यात आली. जळगाव कार्यालयाचे सहायक आयुक्त (अन्न) दीनानाथ शिंदे, अन्न सुरक्षा अधिकारी शरद म. पवार, आकाश कै. बोऱ्हाडे, किशोर आ. साळुंखे आणि योगराज कि. सूर्यवंशी यांनी ही कारवाई केली.
जिल्ह्यात अथवा परिसरात अन्न भेसळीचा प्रकार आढळून आल्यास नागरिकांनी अन्न व औषध प्रशासनाच्या टोल फ्री क्रमांक १८००२२२३६५ वर अथवा तक्रार पोर्टलवर तक्रार नोंदवून प्रशासनास सहकार्य करावे, असे आवाहन अन्न व औषध प्रशासनातर्फे करण्यात आले आहे.
Discussion about this post