जळगाव । जळगाव जिल्ह्यातील पारोळा तालुक्यातील पिंप्री मोंढाळे येथे शासकीय गायरान जमीन बळकावण्यासाठी बनावट कागदपत्रांचा मोठा गैरव्यवहार झाल्याचे चौकशीत समोर आले आहे. शासकीय कार्यालयांचे बनावट शिक्के, अधिकाऱ्यांच्या खोट्या स्वाक्षऱ्या आणि ग्रामपंचायत दप्तरी बोगस नोंदी करून तब्बल दोन एकर सरकारी जमीन खासगी नावावर दाखवण्यात आल्याचा धक्कादायक प्रकार उघड झाला आहे.
या गंभीर प्रकरणाची दखल घेत जळगावचे जिल्हाधिकारी रोहन घुगे यांनी तत्कालीन ७ ग्रामसेवक, ८ आजी-माजी सरपंच आणि ४० भूमाफियांवर तात्काळ फौजदारी गुन्हे दाखल करण्याचे आदेश दिले आहेत. तसेच संबंधित जमीन पुन्हा शासकीय ताब्यात घेऊन त्यावरील अतिक्रमणे हटवण्याचे निर्देश महसूल विभागाला देण्यात आले आहेत.
सामाजिक कार्यकर्ते गुलाबराव जगन्नाथ पाटील यांनी या प्रकरणी गेल्या साडेचार वर्षांपासून प्रशासनाकडे सातत्याने पाठपुरावा केला होता. त्यांच्या तक्रारीनंतर एरंडोल उपविभागीय अधिकाऱ्यांच्या चौकशी समितीने तपास सुरू केला. तपासादरम्यान गट क्रमांक १४० (सर्व्हे क्रमांक ८४) मधील सरकारी गायरान जमिनीचे बनावट ‘नमुना ८’ उतारे तयार करण्यात आल्याचे समोर आले.
या उताऱ्यांवर शासकीय अधिकाऱ्यांच्या खोट्या स्वाक्षऱ्या करण्यात आल्या तसेच बनावट शिक्क्यांचाही वापर करण्यात आला. त्यानंतर संबंधित जमीन खासगी मालकीची असल्याचे दाखवून ग्रामपंचायतीच्या अधिकृत नोंदींमध्ये बोगस माहिती नोंदवण्यात आल्याचे चौकशीत स्पष्ट झाले.
जिल्हाधिकाऱ्यांच्या आदेशानंतर महसूल विभाग आता ॲक्शन मोडमध्ये आला असून संबंधित गायरान जमिनीवरील अतिक्रमणे हटवून जागा पुन्हा सरकारी ताब्यात घेण्याची प्रक्रिया सुरू करण्यात येणार आहे. या प्रकरणामुळे संपूर्ण पारोळा तालुक्यात खळबळ उडाली असून शासकीय जमिनींच्या गैरव्यवहारांवर प्रशासनाने कठोर भूमिका घेतल्याचे दिसून येत आहे. या घोटाळ्यात तत्कालीन ग्रामसेवक, सरपंच आणि इतर संबंधितांवर फौजदारी तसेच प्रशासकीय कारवाई होण्याची शक्यता असून पुढील चौकशी सुरू आहे.
Discussion about this post