NEET पेपरफुटी प्रकरणात मोठी कारवाई; नाशिकसह देशभरातून १६ संशयित ताब्यात

नाशिक । देशभरात खळबळ उडवून देणाऱ्या ‘नीट’ (NEET) परीक्षा पेपर फुटी प्रकरणामध्ये एक मोठी अपडेट समोर आली आहे. या प्रकरणात तपास यंत्रणांनी देशभरातून १६ संशयित आरोपींना ताब्यात घेतले असून, यामध्ये महाराष्ट्रातील २ जणांचा समावेश आहे. यापैकी एका प्रमुख आरोपीला नाशिक पोलिसांच्या गुन्हे शाखेने (क्राईम ब्रँच) इंदिरानगर पोलीस ठाण्याच्या हद्दीतून अत्यंत शिताफीने ताब्यात घेतले आहे.

मिळालेल्या माहितीनुसार, ताब्यात घेण्यात आलेल्या ३० वर्षीय आरोपीचे नाव शुभम खैरनार असे आहे. तो मूळचा नांदगावचा रहिवासी असून ‘बीएएमएस’ (BAMS) चा विद्यार्थी आहे. कारवाई टाळण्यासाठी आरोपी शुभमने स्वतःचा पेहराव बदलला होता. मात्र, राजस्थान पोलिसांकडून मिळालेल्या गोपनीय आणि तांत्रिक माहितीच्या आधारे नाशिक क्राईम ब्रँचने आरोपीचा फोटो मिळवला. इंदिरानगर परिसरात कसून शोध घेत पोलिसांनी वेषांतर केलेल्या शुभम खैरनारच्या मुसक्या आवळल्या.

ही संपूर्ण कारवाई राजस्थान पोलिसांच्या गुप्त माहितीच्या आधारे करण्यात आली आहे. या कारवाईनंतर नाशिक क्राईम ब्रँच आता आरोपी शुभम खैरनारचा ताबा राजस्थान पोलिसांकडे देणार आहे. राजस्थान पोलिसांचे एक पथक आरोपीचा ताबा घेण्यासाठी नाशिकच्या दिशेने रवाना झाले आहे. या अटकेमुळे नीट पेपर फुटीच्या आंतरराज्य रॅकेटमधील आणखी काही मोठे मासे गळाला लागण्याची शक्यता वर्तवली जात आहे.