जळगाव । जळगाव शहरात पोलिस असल्याचे भासवून एका वृद्धाची ११ लाखाहून अधिक किमतीचे सोन्याचे दागिने लंपास करून फसवणूक करण्यात आल्याची घटना उघडकीस आली आहे. ही घटना शहरातील आर. एल. हॉस्पिटलसमोरील रस्त्यावर घडली असून या प्रकरणी जिल्हापेठ पोलिस ठाण्यात दोन अज्ञात भामट्यांविरुद्ध गुन्हा दाखल करण्यात आला आहे.
माधव पितांबर पाटील (वय ७१, रा. उल्हासनगर) हे शहरातून जात असताना साध्या वेशातील सुमारे चाळीशीतील दोन जणांनी त्यांना रस्त्यात अडवले. “आम्ही पोलिस आहोत आणि परिसरात झालेल्या चोरीच्या घटनेचा तपास करीत आहोत,” असे सांगत त्यांनी पाटील यांचा विश्वास संपादन केला.
यानंतर तपासाच्या नावाखाली त्यांनी वृद्धाच्या अंगावरील सोन्याचे ब्रासलेट, चेन आणि दोन अंगठ्या काढून घेण्यास सांगितले. हे सर्व दागिने एका कागदात गुंडाळून त्यांनी पुन्हा पाटील यांच्या हातात पुडी दिली आणि तेथून निघून गेले. काही वेळानंतर पाटील यांनी कागदाची पुडी उघडून पाहिली असता त्यामध्ये नकली दागिने असल्याचे त्यांच्या लक्षात आले.
आपली फसवणूक झाल्याचे समजताच त्यांनी तातडीने जिल्हापेठ पोलिस ठाण्यात धाव घेत तक्रार दाखल केली. पोलिसांनी अज्ञात दोघांविरुद्ध फसवणुकीचा गुन्हा नोंदवला असून परिसरातील सीसीटीव्ही फुटेजच्या आधारे आरोपींचा शोध सुरू केला आहे. नागरिकांनी अशा प्रकारे स्वतःला पोलिस सांगणाऱ्या अनोळखी व्यक्तींवर सहज विश्वास ठेवू नये, असे आवाहन पोलिसांकडून करण्यात आले आहे.
Discussion about this post