मुंबई : महाराष्ट्रातील दूध उत्पादक आणि सर्वसामान्य ग्राहकांसाठी महत्त्वाची बातमी समोर आली आहे. राज्यात आजपासून गायी आणि म्हशीच्या दुधाच्या दरात प्रति लिटर २ रुपयांची वाढ करण्यात आली आहे. त्यामुळे रोजच्या दूध खरेदीसाठी ग्राहकांना आता अधिक पैसे मोजावे लागणार आहेत.
नव्या दरानुसार गायीच्या दुधाचा दर ६० रुपयांवरून ६२ रुपये प्रतिलिटर झाला आहे. तर म्हशीच्या दुधाचा दर ७६ रुपयांवरून ७८ रुपये प्रतिलिटर करण्यात आला आहे. त्यामुळे दूध उत्पादकांना वाढीव दराचा फायदा होणार असला तरी ग्राहकांच्या मासिक बजेटवर अतिरिक्त भार पडणार आहे.
दुग्धजन्य पदार्थही महागले
दूधाच्या दरवाढीबरोबरच विविध दुग्धजन्य पदार्थांच्या किमतींमध्येही वाढ करण्यात आली आहे. दही, ताक, तूप आणि पनीरच्या दरात सुमारे १० टक्क्यांची वाढ झाल्याची माहिती आहे.
दरवाढीचा परिणाम हॉटेल, चहाच्या टपऱ्या, मिठाई दुकाने आणि खाद्यपदार्थ व्यवसायांवरही होण्याची शक्यता आहे. दूध हा दैनंदिन गरजेचा पदार्थ असल्याने या दरवाढीचा थेट परिणाम सर्वसामान्यांच्या घरगुती खर्चावर होणार आहे.
ग्राहकांच्या खिशावर अतिरिक्त भार
आधीच वाढत्या महागाईमुळे घरगुती बजेट सांभाळताना नागरिकांची कसरत होत असताना दूध आणि दुग्धजन्य पदार्थांच्या दरवाढीमुळे खर्चात आणखी वाढ होणार आहे. विशेषतः दररोज मोठ्या प्रमाणात दूध, दही, पनीर किंवा तूप वापरणाऱ्या कुटुंबांना याचा अधिक आर्थिक फटका बसण्याची शक्यता आहे.
Discussion about this post