बीड जिल्ह्यातील अत्यंत चर्चेत असलेल्या मस्साजोग सरपंचपदाच्या पोटनिवडणुकीत मोठा राजकीय उलटफेर पाहायला मिळाला आहे. दिवंगत माजी सरपंच संतोष देशमुख यांच्या हत्येनंतर रिक्त झालेल्या या जागेवर त्यांच्या पत्नी अश्विनी देशमुख यांचा पराभव झाला असून, स्वरूपानंद देशमुख यांनी ९२ मतांनी विजय मिळवला आहे.
माजी सरपंच संतोष देशमुख यांच्या हत्येनंतर रिक्त झालेल्या जागेसाठी पोट निवडणूक घेण्यात आली होती. ही सरपंचपदाची निवडणूक बीड जिल्ह्यात अत्यंत भावनिक आणि राजकीयदृष्ट्या महत्त्वाची मानली जात होती. काल मंगळवारी झालेल्या मतदानामध्ये गावकऱ्यांनी मोठा उत्साह दाखवला होता. एकूण २०८० मतदारांपैकी १७४४ जणांनी मतदानाचा हक्क बजावला, ज्यामुळे गावात ८४ टक्के इतके विक्रमी मतदान झाले होते. केज तहसील कार्यालयात पार पडलेल्या मतमोजणीत पहिल्यापासूनच चुरस पाहायला मिळाली. मात्र, अखेर स्वरूपानंद देशमुख यांनी बाजी मारली.
निकाल जाहीर होताच स्वरूपानंद देशमुख यांच्या समर्थकांनी केज तहसील परिसर आणि मस्साजोग गावात ढोल-ताशांच्या गजरात जल्लोष केला. “विजयाचा गुलाल” उधळत कार्यकर्त्यांनी नवनिर्वाचित सरपंचांना खांद्यावर घेऊन मिरवणूक काढली. या निकालानंतर अश्विनी संतोष देशमुख यांना मोठा धक्का बसलाय.
Discussion about this post