मुंबई । दिवाळीपूर्वी वेतन मिळण्याच्या प्रतीक्षेत असलेल्या महाराष्ट्र राज्य मार्ग परिवहन महामंडळाच्या (एसटी) अधिकारी आणि कर्मचाऱ्यांसाठी दिलासादायक बातमी आहे. सप्टेंबर २०२६ मधील प्रवासी सवलतींच्या प्रतिपूर्तीसाठी राज्य सरकारने ३९१ कोटी रुपयांचा निधी वितरित करण्यास मंजुरी दिली आहे. त्यामुळे एसटीच्या सुमारे ८३ हजार अधिकारी आणि कर्मचाऱ्यांना दिवाळीपूर्वी वेतन देण्यासाठी निधी उपलब्ध होण्याचा मार्ग मोकळा झाला आहे.
एसटी महामंडळातील अधिकारी आणि कर्मचाऱ्यांचे वेतन साधारणपणे दर महिन्याच्या ७ ते १० तारखेदरम्यान अदा केले जाते. मात्र, यंदा दिवाळीचा सण ६ नोव्हेंबरपासून सुरू होत असल्याने कर्मचाऱ्यांना सणापूर्वीच वेतन मिळावे, अशी मागणी होती. कर्मचाऱ्यांना दिवाळीचा सण आर्थिक अडचणींशिवाय साजरा करता यावा, यासाठी एसटी प्रशासनाकडून प्रयत्न सुरू होते.
परिवहन मंत्र्यांचे तातडीने कार्यवाहीचे निर्देश
परिवहन मंत्री तथा एसटी महामंडळाचे अध्यक्ष प्रताप सरनाईक यांनी कर्मचाऱ्यांना दिवाळीपूर्वी वेतन मिळावे, यासाठी एसटी प्रशासनाला तातडीने कार्यवाही करण्याचे निर्देश दिले होते. त्यानुसार परिवहन विभाग आणि एसटी प्रशासनाने शासनाकडून आवश्यक निधी उपलब्ध करून घेण्यासाठी पाठपुरावा केला.या पाठपुराव्यानंतर राज्य सरकारने सप्टेंबर महिन्यातील प्रवासी सवलतींच्या प्रतिपूर्तीसाठी ३९१ कोटी रुपयांचा निधी वितरित करण्यास मंजुरी दिली आहे.
राज्य सरकारच्या या निर्णयामुळे एसटी कर्मचाऱ्यांच्या वेतनासाठी निधी उपलब्ध होण्यास मदत होणार आहे. सणाच्या काळात कर्मचाऱ्यांच्या कुटुंबांवर आर्थिक अडचणींचा ताण पडू नये, यासाठी शासन आणि एसटी प्रशासनाने समन्वयाने कार्यवाही करावी, अशी भूमिका परिवहन मंत्री प्रताप सरनाईक यांनी घेतली होती.दरम्यान, निधीला मंजुरी मिळाल्याने दिवाळीपूर्व वेतनाची अपेक्षा वाढली आहे. मात्र, कर्मचाऱ्यांच्या खात्यात वेतन नेमके कोणत्या दिवशी जमा होणार, याबाबत एसटी प्रशासनाकडून अधिकृत घोषणा झाल्यानंतरच स्पष्टता येईल.
Discussion about this post