नशिराबाद | नशिराबाद शहरातील भवानीनगर परिसरात रविवारी एक अत्यंत दुःखद घटना घडली. घराच्या आवारात खेळत असलेल्या तीन वर्षीय आकांक्षा प्रवीण इंगळे हिचा पाण्याच्या हौदात पडून मृत्यू झाल्याने परिसरात हळहळ व्यक्त केली जात आहे.
मिळालेल्या माहितीनुसार, रविवारी दुपारच्या वेळी घरातील सदस्य जेवणात व्यस्त होते. त्याचवेळी आकांक्षा अंगणात खेळत होती. खेळता-खेळता तिचा तोल जाऊन ती घरातील पाण्याच्या हौदात पडल्याचे सांगण्यात आले. काही वेळ ती नजरेस न पडल्याने कुटुंबीयांनी तिचा शोध सुरू केला. शोधादरम्यान ती हौदात बेशुद्ध अवस्थेत आढळून आली.
कुटुंबीयांनी तातडीने तिला बाहेर काढून जवळच्या रुग्णालयात उपचारासाठी नेले. मात्र, डॉक्टरांनी तपासणीनंतर तिला मृत घोषित केले. या घटनेमुळे इंगळे कुटुंबावर दुःखाचा डोंगर कोसळला असून संपूर्ण भवानीनगर परिसर शोकमग्न झाला आहे.
विशेष म्हणजे, आकांक्षाचा जन्म १ जुलै २०२३ रोजी झाला होता. काही दिवसांपूर्वीच तिचा तिसरा वाढदिवस कुटुंबीयांनी आनंदात साजरा केला होता. वाढदिवसाचा आनंद ओसरत नाही तोच आलेल्या या दुर्दैवी घटनेने कुटुंबीयांसह नातेवाईक आणि परिसरातील नागरिकांना मोठा धक्का बसला आहे.
घटनेची माहिती मिळताच बौद्ध पंच मंडळाचे अध्यक्ष विनोद रंधे यांनी घटनास्थळी भेट देऊन कुटुंबीयांचे सांत्वन केले. तसेच आवश्यक ती पुढील कार्यवाही सुरळीत पार पडावी यासाठी त्यांनी सहकार्य केले.
Discussion about this post