जळगाव । जळगाव शहरातील दंगलग्रस्त कॉलनी परिसरातील जलकुंभ सातत्याने ओव्हरफ्लो होत असल्याने मोठ्या प्रमाणात पाण्याची नासाडी होत असल्याचे समोर आले आहे. एकीकडे दुष्काळाचे सावट आणि पाणीटंचाईची चिंता असताना दुसरीकडे लाखो लिटर पाणी अक्षरशः वाया जात असल्याने नागरिकांमध्ये तीव्र नाराजी व्यक्त होत आहे.
जलकुंभातून पाणी ओसंडून वाहत असल्याचा व्हिडीओ स्थानिक नागरिकांनी काढला असून, हा प्रकार वारंवार घडत असल्याचा आरोप नागरिकांनी केला आहे. जलकुंभ भरल्यानंतर पाण्याचा पुरवठा नियंत्रित करण्यासाठी संबंधित व्हॉल्वमन जागेवर उपस्थित नसल्याने पाणी मोठ्या प्रमाणात वाया जात असल्याचे नागरिकांचे म्हणणे आहे.
दुष्काळाच्या सावटात पाण्याची नासाडी
शहरासह जिल्ह्यात पाण्याच्या उपलब्धतेबाबत नागरिकांमध्ये चिंता असताना जलकुंभातून अशाप्रकारे पाणी वाहून जाणे हा गंभीर प्रकार असल्याची प्रतिक्रिया परिसरातील नागरिकांनी व्यक्त केली. पाण्याची बचत करण्याचे आवाहन केले जात असताना दुसरीकडे प्रशासनाच्या दुर्लक्षामुळेच पाण्याची नासाडी होत असल्याचा आरोप नागरिकांनी केला आहे.
महापालिकेने तातडीने लक्ष देण्याची मागणी
जलकुंभ ओव्हरफ्लो होण्याचे प्रकार थांबविण्यासाठी संबंधित विभागाने तातडीने उपाययोजना करावी, तसेच व्हॉल्वमनची नियमित उपस्थिती सुनिश्चित करावी, अशी मागणी नागरिकांनी केली आहे. वारंवार होणारी पाण्याची नासाडी थांबवून उपलब्ध पाण्याचा योग्य वापर करण्यासाठी महापालिकेने या प्रकरणाची गंभीर दखल घ्यावी, अशी अपेक्षा नागरिकांनी व्यक्त केली आहे.
Discussion about this post