जळगाव । अकोल्याचे सहजिल्हा निबंधक तथा मुद्रांक जिल्हाधिकारी किरण चौधरी यांच्या विरोधातील लाचखोरी प्रकरणात लाचलुचपत प्रतिबंधक विभागाच्या (एसीबी) तपासात मोठा खुलासा झाला आहे. जळगावातील त्यांच्या विष्णुनगर येथील निवासस्थानी झालेल्या झाडाझडतीत तब्बल २ कोटी ९४ लाख ६४ हजार ८४७ रुपयांचा मुद्देमाल जप्त करण्यात आला आहे. एवढ्या मोठ्या प्रमाणात रोख रक्कम, दागिने आणि मालमत्तेशी संबंधित कागदपत्रे सापडल्याने महसूल विभागात मोठी खळबळ उडाली आहे.
किरण चौधरी यांना २६ जून रोजी अकोला येथे १० हजार रुपयांची लाच स्वीकारताना एसीबीने रंगेहात अटक केली होती. या कारवाईनंतर त्यांच्याविरोधात सिटी कोतवाली पोलीस ठाण्यात भ्रष्टाचार प्रतिबंधक कायद्यानुसार गुन्हा दाखल करण्यात आला. तपासाची व्याप्ती वाढवत एसीबीने त्यांच्या जळगावातील घराचीही तपासणी सुरू केली.
चौधरी यांचे घर सुरुवातीला पंचांसमक्ष सीलबंद करण्यात आले होते. मात्र, २८ जून रोजी पहाटे काही नातेवाईकांनी घराच्या मागील बाजूने प्रवेश करून पुरावे नष्ट करण्याचा प्रयत्न केल्याचा प्रकार उघडकीस आला. एसीबी आणि स्थानिक पोलिसांनी तातडीने कारवाई करत संबंधितांना ताब्यात घेतले. या घटनेप्रकरणी जिल्हापेठ पोलीस ठाण्यात स्वतंत्र गुन्हा नोंदविण्यात आला.
झाडाझडतीत काय सापडलं?
२ जुलै रोजी चौधरी यांच्या पत्नी मनीषा चौधरी यांच्या उपस्थितीत पुन्हा घराची सखोल झाडाझडती घेण्यात आली. या कारवाईत एसीबीच्या हाती मोठ्या प्रमाणात रोख रक्कम आणि मौल्यवान साहित्य लागले.
झाडाझडतीत जप्त करण्यात आलेल्या मुद्देमालामध्ये –
१ कोटी ५३ लाख ८४ हजार ६३० रुपयांची रोख रक्कम
४२२.१०० ग्रॅम सोन्याचे दागिने (किंमत ६० लाख ५७ हजार १३५ रुपये)
६२ लाख १३ हजार ३७६ रुपये किमतीची विविध मालमत्तेची कागदपत्रे
३१ हजार ४१६ रुपये किमतीचे चांदीचे दागिने
११ लाख ५२ हजार ७४५ रुपयांच्या सोने खरेदीच्या पावत्या
६ लाख २५ हजार ५४५ रुपये किमतीच्या विविध घरगुती वस्तू
असा एकूण २ कोटी ९४ लाख ६४ हजार ८४७ रुपयांचा मुद्देमाल एसीबीने जप्त केला.
एसीबी आता चौधरी यांच्या मालमत्ता, बँक व्यवहार, गुंतवणूक आणि आर्थिक व्यवहारांची सखोल चौकशी करत आहे. जप्त करण्यात आलेल्या कागदपत्रांच्या आधारे बेहिशेबी संपत्तीबाबतही तपास सुरू असून, या प्रकरणात आणखी महत्त्वाचे खुलासे होण्याची शक्यता तपास यंत्रणांकडून व्यक्त केली जात आहे.
ही कारवाई पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक स्मिता नवघरे, पोलीस निरीक्षक रेश्मा अवतारे आणि लाचलुचपत प्रतिबंधक विभागाच्या विशेष पथकाने केली.
Discussion about this post