नवी दिल्ली । जंतर-मंतर येथे सुरू असलेल्या विद्यार्थी आंदोलनादरम्यान आंदोलकांवर पोलिसांनी कथितपणे केलेल्या मारहाणीची दखल सर्वोच्च न्यायालयाने तातडीने घ्यावी, अशी मागणी करणारी याचिका बुधवारी सरन्यायाधीश सूर्यकांत यांच्या खंडपीठासमोर मांडण्यात आली. मात्र, या प्रकरणाची तातडीने सुनावणी घेण्यास न्यायालयाने नकार दिला. यावेळी “मारहाणीचे व्हिडिओ पाहण्यासाठी आमच्याकडे वेळ नाही. आमचा आणि तुमचाही वेळ वाया घालवू नका,” अशी स्पष्ट टिप्पणी सरन्यायाधीशांनी केल्याचे वृत्त ‘लाइव्ह लॉ’सह काही माध्यमांनी दिले आहे.
दिल्लीतील जंतर-मंतरवर शिक्षणमंत्री धर्मेंद्र प्रधान यांच्या राजीनाम्याच्या मागणीसाठी आणि राष्ट्रीय परीक्षा संस्थेच्या (एनटीए) कार्यपद्धतीत सुधारणा करण्यासाठी विद्यार्थी व युवकांचे आंदोलन सुरू आहे. आंदोलनादरम्यान पोलिसांकडून लाठीमार व बळाचा वापर झाल्याचे आरोप करण्यात आले असून त्यासंबंधीचे काही व्हिडिओ समाजमाध्यमांवर व्हायरल झाले आहेत. या घटनांची न्यायालयीन दखल घेऊन तातडीने सुनावणी निश्चित करण्याची विनंती याचिकाकर्त्यांच्या वकिलांनी सर्वोच्च न्यायालयात केली होती.
सुनावणीदरम्यान वकिलांनी विद्यार्थ्यांच्या मागण्यांचा उल्लेख करताना नीट परीक्षा प्रक्रियेतील कथित त्रुटी, पेपर फुटीचे आरोप आणि एनटीएमधील सुधारणांची आवश्यकता यावर भर दिला. मात्र, त्यांचे म्हणणे मध्येच थांबवत सरन्यायाधीश सूर्यकांत यांनी “खूप धन्यवाद” असे म्हणत पुढील युक्तिवाद ऐकण्यास नकार दिल्याचे वृत्त आहे. त्यानंतर पोलिसी कारवाईचे व्हिडिओ उपलब्ध असल्याचे सांगण्यात आल्यानंतर “आम्हाला व्हिडिओंमध्ये रस नाही. ते पाहण्यासाठी आमच्याकडे वेळ नाही,” अशी टिप्पणी त्यांनी केली.
दरम्यान, याच विषयावरील एका याचिकेवर दिल्ली उच्च न्यायालयानेही मंगळवारी तातडीची सुनावणी घेण्यास नकार दिला होता. न्यायालयाने “प्रत्येक प्रश्नात न्यायालयाला ओढू नका” असे निरीक्षण नोंदविल्याचे वृत्त आहे.
विद्यार्थी आंदोलनाच्या पार्श्वभूमीवर दिल्लीत तणावपूर्ण वातावरण कायम असून आंदोलकांकडून शिक्षण व्यवस्थेतील कथित गैरव्यवहारांविरोधात आंदोलन सुरूच ठेवण्याचा निर्धार व्यक्त करण्यात आला आहे. दुसरीकडे, पोलिसांच्या कारवाईबाबत विविध मानवाधिकार संघटना आणि सामाजिक कार्यकर्त्यांनी प्रश्न उपस्थित केले असून या प्रकरणावरून राजकीय वादही तीव्र झाला आहे.
Discussion about this post