जळगाव : शेतात ये-जा करण्यासाठी नवीन रस्ता मंजूर करून देण्यासह प्रलंबित दाव्याचा निकाल आपल्या बाजूने लावून देण्यासाठी ३० हजार रुपयांची लाच मागितल्याचा प्रकार जामनेर तहसील कार्यालयात समोर आला आहे. तडजोडीनंतर २५ हजार रुपये स्वीकारताना जळगाव लाचलुचपत प्रतिबंधक विभागाच्या पथकाने महसूल सहाय्यकासह एका वकिलाला ताब्यात घेतले.
महसूल सहाय्यक प्रवीण सुपडू गांगुर्डे (४१) आणि वकील योगेश रामलाल वखरे (४२) अशी ताब्यात घेण्यात आलेल्या संशयितांची नावे आहेत.
मिळालेल्या माहितीनुसार, तक्रारदाराची जामनेर शिवारातील गट क्रमांक ४०७ मध्ये शेती आहे. या शेतात जाण्या-येण्यासाठी रस्ता उपलब्ध करून मिळावा, यासाठी त्यांनी २०२२ मध्ये जामनेर तहसील कार्यालयात दावा दाखल केला होता. या प्रकरणाची तहसीलदारांसमोर सुनावणी पूर्ण झाली होती. मात्र, अंतिम निर्णयासाठी हे प्रकरण प्रलंबित होते.
निकालाबाबत माहिती घेण्यासाठी तक्रारदार आणि त्यांचे भाऊ वारंवार तहसील कार्यालयात जात होते. याचदरम्यान त्यांची महसूल सहाय्यक प्रवीण गांगुर्डे यांच्याशी भेट झाली. प्रलंबित दाव्याचा निकाल तक्रारदाराच्या बाजूने लावून देण्यासाठी गांगुर्डे यांनी ३० हजार रुपयांची मागणी केल्याचा आरोप करण्यात आला.
त्यानंतर लाचेची रक्कम २५ हजार रुपयांवर निश्चित झाल्याचे तक्रारीत नमूद आहे. याबाबत तक्रारदाराने जळगाव एसीबीकडे तक्रार केली. तक्रारीची पडताळणी पंचांसमक्ष करण्यात आली. या प्रक्रियेदरम्यान वकील योगेश वखरे याने महसूल सहाय्यक गांगुर्डे यांच्यासाठी तक्रारदाराकडे २५ हजार रुपयांची मागणी केल्याचे एसीबीच्या कारवाईत निष्पन्न झाल्याचे सांगण्यात आले.
यानंतर एसीबीच्या पथकाने सापळा रचला. ठरल्याप्रमाणे २५ हजार रुपयांची रक्कम स्वीकारल्यानंतर पथकाने दोघांना ताब्यात घेतले. लाचेची रक्कमही जप्त करण्यात आली.या कारवाईचे पर्यवेक्षण पोलीस उपअधीक्षक योगेश ठाकूर यांनी केले. पोलीस निरीक्षक रेश्मा अवतारे यांनी सापळा अधिकारी म्हणून कारवाईची जबाबदारी सांभाळली. पंचांच्या उपस्थितीत ही कारवाई करण्यात आली.
या प्रकरणी जामनेर पोलीस ठाण्यात भ्रष्टाचार प्रतिबंध अधिनियमातील संबंधित कलमांनुसार गुन्हा दाखल करण्याची प्रक्रिया सुरू होती. प्रलंबित दाव्याचा निकाल, लाचेची मागणी आणि स्वीकारलेली रक्कम यासंदर्भात एसीबीकडून पुढील तपास करण्यात येत आहे.
Discussion about this post