जामनेर । राज्य परिवहन महामंडळाच्या जामनेर आगारातून नवी कोरी ‘जिजाऊ’ एसटी बस अज्ञात इसमाने मध्यरात्री पळवून नेल्याची धक्कादायक घटना सोमवारी उघडकीस आली. एमएच १९, एनई ४२१४ क्रमांकाची ही बस रविवारी रात्री अडीच वाजेच्या सुमारास आगारातून गायब झाली होती. मात्र, पुढील चाक पंक्चर झाल्यामुळे शहापूर गावाजवळील खडकी नदीच्या पुलावर बस सोडून चोरट्याने तेथून पोबारा केला.
ग्रामस्थांमुळे प्रकार आला समोर
सोमवारी सकाळी शहापूर येथील ग्रामस्थांना खडकी नदीवरील फरशी पुलावर बंद अवस्थेत एसटी बस उभी असल्याचे दिसून आले. या मार्गावर अचानक बस उभी असल्याने ग्रामस्थांमध्ये कुतूहल निर्माण झाले. पाहणीदरम्यान सदर बस जामनेर आगाराची असल्याचे निष्पन्न झाले. शहापूर गावात राहणाऱ्या जामनेर आगारातील चालक-वाहकांना याबद्दल माहिती मिळताच त्यांनी तातडीने घटनास्थळी धाव घेऊन खात्री केली व आगार व्यवस्थापक दिनेश नाईक यांना घटनेची कल्पना दिली.
रविवारी रात्री सुमारे अडीच वाजता अज्ञात इसमाने ही बस आगारातून बाहेर काढून शहापूरच्या दिशेने पळवली. मात्र, खडकी नदीच्या पुलाजवळ पोहोचताच बसचे पुढील चाक पंक्चर झाले. पुढे गाडी चालवणे अशक्य झाल्याने संशयिताने बस पुलावरच सोडून पलायन केले. ही नवी कोरी ‘जिजाऊ’ बस जळगाव-नेरी-जामनेर मार्गावर प्रवाशांच्या सेवेत धावत होती. थेट आगारातूनच बस पळवून नेल्याने एसटी महामंडळात प्रचंड खळबळ उडाली आहे.
आगार व्यवस्थापक दिनेश नाईक यांच्या तक्रारीवरून जामनेर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. आगारातील सीसीटीव्ही फुटेजची पाहणी केली असता संशयित आरोपी कॅमेऱ्यात कैद झाल्याचे दिसून आले आहे. पोलीस आता या फुटेजच्या आधारे चोरट्याची ओळख पटवण्याचे काम करत आहेत.
सुरक्षा व्यवस्थेचा बट्ट्याबोळ; अनेक प्रश्न उपस्थित
एसटी आगारातून नवी कोरी बस थेट पळवून नेल्यामुळे जामनेर आगाराच्या सुरक्षा व्यवस्थेचे तीनतेरा वाजल्याचे स्पष्ट झाले आहे. मध्यरात्री बस बाहेर जात असताना सुरक्षा कर्मचाऱ्यांचे याकडे लक्ष कसे गेले नाही? बसच्या चाव्या चोरट्याच्या हाती कशा लागल्या? आणि बस पळवण्यामागचा नेमका हेतू काय होता? असे अनेक प्रश्न आता उपस्थित केले जात आहेत. या प्रकरणाचा पुढील तपास जामनेर पोलीस करत आहेत.
Discussion about this post