घरातून अचानक गायब अन् थेट पद्मालयच्या जंगलात मृतदेह; जळगावातील महिलेच्या खुनाचा उलगडा

जळगाव । जळगावातून एक खळबळजनक घटना समोर आली आहे. जुन्या प्रेमसंबंधाच्या वादातून ३९ वर्षीय विवाहित महिलेचे अपहरण करून तिचा अतिशय निर्घृणपणे खून करण्यात आल्याचे उघडकीस आले आहे. कविता अरुण सुतार असं मृत महिलेचं नाव असून याप्रकरणी जळगाव एमआयडीसी पोलिसांनी आपल्या तांत्रिक कौशल्याचा आणि खबऱ्यांच्या जाळ्याचा वापर करून अवघ्या काही दिवसांतच या गूढ प्रकरणाचा यशस्वी छडा लावला आहे.

प्राप्त माहितीनुसार, ८ सप्टेंबर २०२६ रोजी सकाळी आठच्या सुमारास मृत कविता सुतार यांच्या घरात नेहमीप्रमाणे दैनंदिन कामकाज सुरू होते. त्यांनी आपल्या मुलासाठी जेवणाचा डबा तयार करून ठेवला होता. मात्र, त्यांचा मुलगा आंघोळ करून बाहेर आल्यानंतर कविता घरात दिसून आल्या नाहीत. त्यांचा मोबाईल फोनही सतत बंद येत होता. कुटुंबीयांनी आजूबाजूला आणि नातेवाईकांकडे तातडीने शोधाशोध केली, परंतु त्यांचा पत्ता लागला नाही. दिवसभर शोध घेऊनही त्या न मिळाल्यामुळे आणि मोबाईल बंद असल्याने, अज्ञात व्यक्तीने त्यांचे अपहरण केल्याची खात्री पटली. याप्रकरणी एमआयडीसी पोलीस ठाण्यात अपहरणाचा गुन्हा दाखल करण्यात आला होता.

पद्मालयच्या घनदाट जंगलात आढळला मृतदेह

गुन्ह्याचे गांभीर्य लक्षात घेता, पोलीस अधीक्षक श्रीकांत धिवरे आणि इतर  वरिष्ठ अधिकाऱ्यांच्या मार्गदर्शनाखाली एमआयडीसी पोलिसांनी तपासाची चक्रे वेगाने फिरवली. परिसरातील शेकडो सीसीटीव्ही कॅमेऱ्यांचे फुटेज, मोबाईल कॉल डिटेल्सचे तांत्रिक विश्लेषण आणि गोपनीय बातमीदारांच्या आधारे पोलीस तपासात महत्त्वपूर्ण धागेदोरे हाती लागले. यादरम्यान, १३ सप्टेंबर २०२६ रोजी एरंडोल पोलीस ठाण्याच्या हद्दीतील प्रसिद्ध धार्मिक व पर्यटन स्थळ असलेल्या पद्मालय परिसरातील घनदाट जंगलात कविता सुतार यांचा मृतदेह संशयास्पद स्थितीत आढळून आला. या शोधानंतर अपहरणाच्या गुन्ह्याचे रूपांतर थेट खुनाच्या गुन्ह्यात करण्यात आले.

तांत्रिक विश्लेषणातून मिळालेल्या माहितीच्या आधारे पोलिसांनी जळगाव शहरात सापळा रचून संशयित नरेश उर्फ आबा अनिल सोनवणे याला शिताफीने ताब्यात घेतले. पोलिसांनी कसून चौकशी केल्यानंतर त्याने गुन्ह्याची कबुली दिली. जुन्या प्रेमसंबंधावरून झालेल्या वादातून आपणच कविता सुतार यांचे अपहरण केले होते आणि त्यांना पद्मालयच्या जंगलात नेऊन दगडाने डोके ठेचून त्यांची हत्या केल्याची माहिती त्याने दिली. याप्रकरणी पोलिसांनी आरोपीला तात्काळ अटक केली असून, पुढील तपास पोलीस उपनिरीक्षक अशोक काळे करीत आहेत. या थरारक घटनेमुळे जळगाव जिल्ह्यात मोठी सनसनाटी पसरली आहे.