जळगाव : लाचलुचपत प्रतिबंधक विभागाने (एसीबी) जळगावात मोठी कारवाई करत शनीपेठ पोलीस ठाण्यात कार्यरत असलेल्या एका लोकसेवकाला १ लाख रुपयांची लाच स्वीकारताना रंगेहाथ अटक केली. या घटनेमुळे पोलीस विभागात खळबळ उडाली आहे.
मिळालेल्या माहितीनुसार, विनोद पितांबर अहिरे (वय ४०) असे अटक करण्यात आलेल्या संशयित पोलीस कर्मचाऱ्याचे नाव असून ते शनीपेठ पोलीस स्टेशनमध्ये कार्यरत आहेत. तक्रारदाराच्या मुलाविरुद्ध दाखल तक्रार अर्जावर कोणतीही कायदेशीर कारवाई न करता तो निकाली काढण्यासाठी आरोपीने २ लाख रुपयांची लाच मागितल्याचा आरोप आहे.
याप्रकरणी तक्रारदाराने एसीबीकडे तक्रार दिल्यानंतर अधिकाऱ्यांनी पडताळणी केली असता लाच मागितल्याचे निष्पन्न झाले. त्यानुसार १३ एप्रिल रोजी सापळा रचण्यात आला. सापळा कारवाईदरम्यान आरोपीने तक्रारदाराकडून १ लाख रुपयांची रक्कम स्वीकारताच एसीबीच्या पथकाने त्याला रंगेहाथ पकडले.
या प्रकरणी भ्रष्टाचार प्रतिबंधक अधिनियम १९८८ (सुधारित २०१८) अंतर्गत कलम ७ नुसार गुन्हा नोंदविण्याची प्रक्रिया सुरू असून पुढील तपास एसीबीकडून करण्यात येत आहे.
ही कारवाई पोलीस उपअधीक्षक योगेश ठाकूर यांच्या मार्गदर्शनाखाली पार पडली. सापळा अधिकारी म्हणून पोलीस निरीक्षक हेमंत नागरे यांच्यासह सुरेश पाटील, संगिता पवार, राकेश दुसाने, सचिन चाटे आणि अमोल सूर्यवंशी यांनी सहभाग घेतला.
दरम्यान, कोणताही शासकीय कर्मचारी लाच मागत असल्यास नागरिकांनी तत्काळ लाचलुचपत प्रतिबंधक विभागाशी संपर्क साधावा, असे आवाहन करण्यात आले आहे.
Discussion about this post