जळगाव जिल्ह्यात एफडीएची मोठी कारवाई ! लाखोंचा खाद्यसाठा जप्त

जळगाव : दिवाळीचा सण जवळ येताच बाजारपेठांमध्ये खाद्यपदार्थांची खरेदी-विक्री वाढली आहे. याच गर्दीच्या हंगामात ग्राहकांच्या आरोग्याशी तडजोड करणाऱ्या व्यावसायिकांविरोधात अन्न व औषध प्रशासनाने कारवाईचा बडगा उगारला आहे. जळगाव जिल्ह्यात राबविण्यात आलेल्या विशेष मोहिमेत खाद्यतेल, खवा आणि पेढ्यांचा मोठा साठा जप्त करण्यात आला आहे. जळगाव एमआयडीसीतील एका तेल कंपनीवर कारवाई करत ७ लाख ६५ हजार रुपये किमतीचे ४ हजार ४२५ किलो तेल सील करण्यात आले. तर धरणगावातही १७ लाखांहून अधिक किमतीचा तेलसाठा जप्त करण्यात आल्याने व्यावसायिकांमध्ये खळबळ उडाली आहे.

सणासुदीच्या काळात मिठाई, खाद्यतेल, खवा आणि इतर खाद्यपदार्थांना मोठी मागणी असते. या संधीचा गैरफायदा घेत निकृष्ट दर्जाचे किंवा नियमांचे उल्लंघन करून तयार केलेले पदार्थ बाजारात विकले जाण्याची शक्यता लक्षात घेऊन प्रशासनाने जिल्हाभर तपासणी मोहीम सुरू केली आहे. या मोहिमेअंतर्गत जळगाव शहरातील एमआयडीसी परिसरातील सात प्रमुख तेल उत्पादक कंपन्यांची अचानक तपासणी करण्यात आली.

या तपासणीत एका कंपनीत अन्न सुरक्षा नियमांचे उल्लंघन होत असल्याचे निदर्शनास आले. त्यानंतर अधिकाऱ्यांनी ४ हजार ४२५ किलो तेलाचा साठा ताब्यात घेत सील केला. जप्त तेलाचे बाजारमूल्य ७ लाख ६५ हजार रुपये आहे. या साठ्याचे नमुने तपासणीसाठी पाठविण्यात आले असून, प्रयोगशाळेचा अहवाल येईपर्यंत तेलाचा वापर करता येणार नाही.

पारोळा ते चोपड्यापर्यंत कारवाईचा धडाका

केवळ जळगाव शहरापुरतीच ही मोहीम मर्यादित न ठेवता जिल्ह्यातील इतर शहरांमध्येही तपासणी करण्यात आली. पारोळा येथे नियमांचे उल्लंघन केल्याप्रकरणी एका केटरर्सचा परवाना रद्द करण्यात आला. चाळीसगावमध्ये २४ किलो खवा जप्त करण्यात आला असून, त्याची किंमत ९ हजार १०० रुपये आहे.

धरणगावमध्ये प्रशासनाने मोठी कारवाई करत तब्बल १७ लाख २३ हजार रुपये किमतीचा ४ हजार ५०० किलो तेलसाठा जप्त केला. तर चोपडा शहरात अस्वच्छ वातावरणात तयार केले जात असलेले १६ हजार रुपये किमतीचे पेढे जप्त करण्यात आले. त्यामुळे जिल्ह्यातील खाद्यपदार्थ विक्रेते आणि उत्पादकांचे धाबे दणाणले आहेत.

दीनानाथ शिंदे यांच्या मार्गदर्शनाखाली मोहीम

जळगाव एमआयडीसीतील कारवाई अन्न व औषध प्रशासनाचे सहायक आयुक्त दीनानाथ शिंदे यांच्या मार्गदर्शनाखाली करण्यात आली. अन्न सुरक्षा अधिकारी शरद पवार, किशोर साळुंखे आणि आकाश बोराडे यांच्या पथकाने ही तपासणी केली.

दिवाळीच्या पार्श्वभूमीवर नागरिकांना शुद्ध आणि सुरक्षित खाद्यपदार्थ मिळावेत, यासाठी प्रशासनाने तपासणीचा वेग वाढविला आहे. मिठाई, खवा, खाद्यतेल खरेदी करताना ग्राहकांनीही दक्षता घ्यावी, असे आवाहन करण्यात आले आहे. सणाच्या आनंदात भेसळयुक्त पदार्थांमुळे आरोग्याला धोका निर्माण होऊ नये, यासाठी प्रशासनाची ही मोहीम महत्त्वपूर्ण ठरत आहे.