जळगाव : राज्यातील शेतकरी दुष्काळाच्या संकटाचा सामना करत असताना दिवाळीनिमित्त सरकारने त्यांच्या बँक खात्यात जमा केलेल्या पाच हजार रुपयांच्या मदतीवरून राजकीय वातावरण चांगलेच तापले आहे. आर्थिकदृष्ट्या सक्षम असलेल्या शेतकऱ्यांनी गरज नसेल तर मदतीची रक्कम परत करावी, असे आवाहन राज्याचे जलसंपदा मंत्री तथा नाशिकचे पालकमंत्री गिरीश महाजन यांनी केले होते. त्यांच्या या विधानावर राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी तीव्र संताप व्यक्त करत महाजन यांच्यावर जोरदार हल्लाबोल केला आहे.
‘पाच हजार देऊन शेतकऱ्यांची थट्टा केली’
गिरीश महाजन यांच्या विधानावर प्रतिक्रिया देताना रोहित पवार यांनी त्यांच्यावर सडकून टीका केली. “गिरीश महाजन यांना मला सांगायचे आहे की, तुम्हाला लाज वाटली पाहिजे. एकतर पाच हजार रुपये देऊन तुम्ही शेतकऱ्यांची थट्टा केली आहे. त्यातही आता गरिबांच्या बाबतीत दिलेले पैसे परत मागत आहात. शेतमजुरांना तुम्ही काहीच मदत केली नाही,” असे रोहित पवार म्हणाले.
पुढे त्यांनी नाशिकमधील महाकुंभाच्या कामावरूनही महाजन यांना लक्ष्य केले. “पवित्र भूमी नाशिकमध्ये, जिथे महाकुंभ होतोय, तिथे तुम्ही हजारो कोटींचा भ्रष्टाचार करत आहात. मात्र, गरिबांच्या बाबतीत दिलेले पैसे परत मागत आहात. या सरकारमधील प्रत्येकाला लाज वाटली पाहिजे. यांना काहीच कळत नाही. अशा नेत्यांना योग्य वेळी जनताच जागा दाखवेल,” अशा शब्दांत रोहित पवार यांनी संताप व्यक्त केला.
नेमके काय म्हणाले होते गिरीश महाजन?
राज्यातील शेतकऱ्यांना दिवाळीनिमित्त सरकारकडून पाच हजार रुपयांची आर्थिक मदत देण्यात आली आहे. याच मदतीबाबत बोलताना मंत्री गिरीश महाजन यांनी आर्थिकदृष्ट्या सक्षम असलेल्या शेतकऱ्यांना पैसे परत करण्याचे आवाहन केले होते.
“सरकारने सर्व शेतकऱ्यांना पाच-पाच हजार रुपयांची मदत दिली आहे. मात्र, अनेक शेतकरी असे आहेत की, त्यांनी मला भेटून पाच हजार रुपये मिळाले असले तरी आम्हाला त्याची आवश्यकता नाही, असे सांगितले. आमचा जोडधंदा आहे आणि आमच्याकडे पैशांची चणचण नाही. त्यामुळे ज्यांना या पैशांची गरज नाही, अशा आर्थिकदृष्ट्या सक्षम शेतकऱ्यांनी पाच हजार रुपये परत करावेत,” असे महाजन यांनी म्हटले होते.
दरम्यान, महाजन यांच्या या विधानामुळे शेतकऱ्यांच्या आर्थिक मदतीचा मुद्दा पुन्हा एकदा चर्चेत आला असून, रोहित पवार यांच्या आक्रमक प्रतिक्रियेमुळे राज्यातील राजकीय वातावरण तापण्याची शक्यता आहे.
Discussion about this post